ബ്രാഹ്മിൺ ആണോ...
അല്ല...
അല്ല, വെജിറ്റേറിയൻ ആണെന്ന് പറഞ്ഞതുകൊണ്ട് ചോദിച്ചതാണ്.
അയാളെ കണ്ടാൽ SC/ST യിൽ പെട്ടതാണെന്നും പറയില്ല ട്ടോ... നല്ല വെളുത്ത് തുടുത്തിരിക്കുന്നത് കണ്ടില്ലേ...
സ്സ്സ്... അമ്മ പണ്ടെതെങ്കിലും മതില് ചാടിയതായിരിക്കാനെ വഴിയുള്ളൂ...
അയാളെ കണ്ടാൽ ഒരിക്കലും പൂജാരിയാണെന്നൊന്നും പറയില്ല. ആ രൂപം നോക്ക്... കറുത്ത് ഇരുണ്ട്....
അയ്യേ... ഈ ഹൈറ്റ് ഇല്ലാത്തയാളാണോ കേണൽ...
അയ്യേ... ഈ കുടവയറനാണോ പോലീസ്...
അവൾക്ക് ലോട്ടറിയടിച്ചതാണ്... ആ ചെക്കൻ ഷാറൂഖ് ഖാനെ പോലെയുണ്ട്.
താടിയും മുടിയും വളർത്തി എന്തൊരു കോലമാണ് ചെക്കന്റെ... കഞ്ചാവാണെന്നെ പറയൂ....
അവളുടെയൊരു നടത്തോo കളിയും മിനിങ്ങലും... അവളെ കണ്ടാലറിയാം പോക്കു കേസാണെന്ന്...
അവള് രാത്രി വൈകിയിട്ടൊക്കെയാണ് കേറിവരുന്നത്. പല ചെക്കന്മാരുടെ കൂടെ കറങ്ങി നടക്കുന്നതും കണ്ടിട്ടുണ്ട്. അവൾ വെടിയാണ്...
ഓന്റെ താടി കണ്ടാൽ അറിഞ്ഞൂടെ IS ആണെന്ന്. പിന്നെ ഫുൾ ടൈം പള്ളിയിലും...
ഓൻ സംഘി ആണ്. കയ്യിൽ മറ്റേ രാഖിയും കുറിയും രുദ്രാക്ഷവും...
ഓനിപ്പോ പത്രാസില് നടക്കുന്നത് നോക്കണ്ട... ഓന്റെ അച്ഛനും അമ്മയും നമ്മളെ തോട്ടത്തില് പണിയെടുത്തതാണ്.
ഓനോ... ഓന്റച്ചൻ ചെത്തുകാരൻ അല്ലെ...
ഇങ്ങനെ പോകുന്ന വർത്തമാനങ്ങൾ... ജാതിയുടെ തൊലിയുടെ നിറത്തിന്റെ ജോലിയുടെ ആചാരത്തിന്റെ വസ്ത്രത്തിന്റെ വേഷത്തിന്റെ പേരിൽ ചാപ്പ കുത്തുന്ന പുരോഗമനവാദികളുടെ നടുക്ക് പുരോഗമനം പറഞ്ഞു ഏമ്പക്കവും വിട്ട് നീട്ടി ബളിയിടുന്ന ഞാനും നിങ്ങളും അടങ്ങുന്ന സമൂഹം...
ഇതിങ്ങനെ തന്നെ പോയാലെ ചിലർക്കെങ്കിലും ഇവിടെ ജീവിച്ചു പോകാൻ പറ്റൂ. അധികാരം നേടിയെടുക്കാൻ പറ്റൂ... വീണ്ടും വീണ്ടും അധികാരത്തിന്റെ അപ്പ കഷണം നുണയാൻ പറ്റൂ...
©മോഹൻദാസ് വയലാംകുഴി
