സമൂഹത്തിന്റെ മുഖ്യധാരയിൽ നിൽക്കുന്ന പലരും ആളുകൾക്ക് മുന്നിൽ നിൽക്കുമ്പോഴും പ്രസംഗിക്കുമ്പോഴും കാണിക്കുന്ന കപട സദാചാരം വെറുമൊരു മുഖംമൂടി മാത്രമാണെന്ന കാര്യം ആരും തിരിച്ചറിയുന്നില്ല. ആണും പെണ്ണും തുല്യത കൈവരിക്കണം, തുല്യമായ പങ്കാളിത്തം ഉറപ്പു വരുത്തണം എന്നൊക്കെ പറയും. ഇതേ പറയുന്നവരാണ് ഏറ്റവും കൂടുതൽ സ്ത്രീകൾക്ക് വിലക്ക് കല്പിക്കുന്നവർ.
ഞാൻ ഒന്ന് പറഞ്ഞോട്ടെ, നിങ്ങളിൽ എത്രപേരുണ്ട് സ്വന്തം വീട്ടിലെ തീൻ മേശയിൽ ഒരുമിച്ചിരുന്ന് ആഹാരം കഴിക്കുന്നവർ, അടുക്കളയിൽ കയറി ആഹാരമുണ്ടാക്കുന്നവർ (ബാച്ചിലർമാരുടെ കാര്യമല്ല), അലക്കുന്നവർ, മുറ്റമടിക്കുന്നവർ, മറ്റെല്ലാ കാര്യങ്ങളിലും തുല്യമായി സഹായിക്കുന്നവർ....??
വിരലിൽ എണ്ണാവുന്നവർ... അതുമല്ലെങ്കിൽ ഭാര്യയെ പേടിയുള്ളവർ, അതുമല്ലെങ്കിൽ രണ്ടുപേരും ജോലിക്ക് പോകുന്നവരായത് കൊണ്ടു മാത്രം ചില കാര്യങ്ങളിൽ സഹായിക്കുന്നവർ... അപ്പോഴും അവിടെ ആത്മാർഥമായ ഒരു സഹകരണം ഉണ്ടാകുന്നില്ല. എന്ത് അടിസ്ഥാനത്തിലാണ് പുരുഷൻ ജോലിക്ക് പോയി വീട് നോക്കണമെന്നും സ്ത്രീ അടുക്കള പണി എടുക്കണമെന്നും പറയുന്നത്.
ആണും പെണ്ണും കൂട്ടുകൂടാൻ പാടില്ല, ഒരുമിച്ചു നടക്കാനോ, ഒരുമിച്ചു യാത്ര ചെയ്യാനോ പാടില്ല. എന്നിട്ടും തുല്യതയ്ക്ക് വേണ്ടി മുറവിളി കൂട്ടുന്നു.
നിയമവും നിയമ വ്യവസ്ഥകളും മാറ്റിവെച്ച് നിങ്ങളൊരു മനുഷ്യനാകൂ. പരസ്പരം സ്നേഹിക്കുകയും ബഹുമാനിക്കുകയും ചെയ്യൂ. ആദ്യം വേണ്ടത് അതാണ്.
ഒരു കുഞ്ഞു ജനിച്ചു വീണ ഉടനെ ലിംഗവിവേചനം തുടങ്ങുന്നു. പൊട്ടു തൊടാനും കണ്ണെഴുതാനും കാലിലും കയ്യിലും കഴുത്തിലും ചെവിയിലും ലിംഗവിവേചനത്തിന്റെ രേഖകൾ ശക്തമായി രേഖപ്പെടുത്തുന്നു. എന്നിട്ടും പോരാത്തതിന് ധരിക്കുന്ന വസ്ത്രങ്ങളിൽ ഈ വിവേചനം കൃത്യമായി അടയാളപ്പെടുത്തുന്നു.
എന്റെ അറിവുവെച്ചു പറയുകയാണെങ്കിൽ, ഋതുമതിയാകുന്നതുവരെയും ഒരു പെൺ കുട്ടിയും ഒരാൺ കുട്ടിയും Biologically വല്ല്യ വ്യത്യാസമൊന്നും ഇല്ല എന്നാണ് തോന്നുന്നത്. അപ്പോൾ പിന്നെ എന്തിനാണ് ആ കാലഘട്ടം വരെ നീ പെണ്ണാണ്, നീ ചുരിദാറും, പാവാടയും, ബ്ലൗസും, മിടിയും ടോപ്പും, ദാവണിയും മാത്രമേ ധരിക്കാൻ പാടുള്ളൂ, മുടി നീട്ടി വളർത്തണം, ചെവിയിൽ കാത് കുത്തണം, പാദസരം ഇടണം, മാലയിടണം, പൊട്ടു തൊടണം എന്നൊക്കെ വാശി പിടിക്കുന്നത്...? കളിക്കാൻ പാവയും അടുക്കള പാത്രങ്ങളും മാത്രമേ വാങ്ങിക്കൊടുക്കുള്ളൂ. ആൺകുട്ടിയെ പഠിപ്പിച്ചാൽ ഗുണമുണ്ട്. പെൺകുട്ടിയെ പഠിപ്പിച്ചിട്ടെന്ത് കാര്യം... അവർ മറ്റൊരു വീട്ടിലേക്ക് പോകേണ്ടവരണല്ലോ, എന്നൊക്കെയുള്ള മനോഭാവം. ഇപ്പോഴും സ്ത്രീധനമെന്ന വൃത്തികെട്ട വ്യവസ്ഥിതി നിലവിലുണ്ടല്ലോ...!!
പറഞ്ഞു വരുന്നത്, ആരാണ് ലിംഗവിവേചനം നടത്തുന്നത്... സ്വന്തം വീട്ടിൽ നിന്ന് തുടങ്ങുന്നതാണ്. പിന്നീട് സമൂഹ മധ്യത്തിലിറങ്ങുമ്പോഴേക്കും വിവേചനത്തിന്റെ പരകോടിയിൽ എത്തിയിട്ടുണ്ടാകും ഒരാണും പെണ്ണും.
ചില മതങ്ങളിൽ സ്ത്രീകളുടെ അടുത്ത് പുരുഷന്മാർ ഇരിക്കാൻ പാടില്ല, കാണാൻ പാടില്ല, ഒന്നിച്ചിരുന്നു ഭക്ഷണം കഴിക്കാൻ പാടില്ല. കല്യാണ സമയത്ത് പെണ്ണിന്റെ പിതാവ് ആണിന്റെ കൈപിടിച്ചാണ് വിവാഹം പോലും ഉറപ്പിക്കുന്നത്. ഇതൊക്കെ എന്നാണ് മാറാൻ പോകുന്നത്....
അപ്പോൾ വെറും വായിൽ ഛർദ്ധിക്കുകയോ വിശ്വാസ പ്രമാണങ്ങളിൽ നിയമപരമായ മാറ്റം വരുത്തിയതുകൊണ്ടോ കാര്യമില്ല. ആളുകളുടെ മനോഭാവമാണ് ആദ്യം മാറേണ്ടത്. വർഗ്ഗ ശത്രുക്കൾ നമുക്കിടയിൽ തന്നെയുണ്ട്. നിങ്ങൾ മറ്റുള്ളവരെ രണ്ടു കണ്ണുകൊണ്ട് സംശയത്തോടെ നോക്കുമ്പോൾ നിങ്ങളെ ഈ ലോകത്തെ മുഴുവൻ കണ്ണുകളും സംശയത്തോടെ നോക്കുമെന്ന് അറിയുക.
ലിംഗ സമത്വം അംഗീകരിക്കാത്തവർ പുരോഗമനാശയങ്ങൾ ഉൾക്കൊള്ളാൻ കഴിയാത്തവരാണെന്ന് സാരം. സ്ത്രീ പുരുഷ സമത്വം പൂർണമായിട്ടുള്ള പശ്ചാത്യ രാജ്യങ്ങളിൽ ഉള്ളതിലും ശക്തമായ കുടംബ ബന്ധം ഇവിടെ നിലനിൽക്കുന്നത് ചിലപ്പോൾ സ്ത്രീ പുരുഷ സമത്വം ഇല്ലാത്തതിനാലാവാം.
ഈ ഒരൊറ്റ വിധിയോടെ ലിംഗനീതി കൈവരിച്ചിരിക്കുന്നതിനാൽ സ്ത്രീകൾക്ക് വീക്കർ സെക്സ് എന്ന നിലയിൽ അനുവദിച്ചു നൽകിയിട്ടുള്ള എല്ലാ ആനുകൂല്യങ്ങളും പിൻവലിക്കേണ്ടതാണ്.
ചുരുക്കി പറയട്ടെ, നിങ്ങൾക്ക് ചുറ്റുമുള്ള (ആണും പെണ്ണും) കുറച്ചു പേരെ നിങ്ങൾ ഒരൊറ്റ കണ്ണിലൂടെ കാണാൻ ശ്രമിക്കൂ. ആണിനേയും പെണ്ണിനേയും രണ്ടായി കാണാതെ നിങ്ങൾക്കൊപ്പം ചേർത്തു നിർത്തു.
ഉണരുക.... ഉയരുക... ലോകത്തിനൊപ്പം, കാലത്തിനൊപ്പം....
Time is God.
