സ്ഥലകാലജലഭ്രമം

മുംബൈയിൽ നിന്നും ഡൽഹിയിലേക്കുള്ള യാത്രയ്ക്കിടയിലാണ് മുംബൈ സ്വദേശിയായ ഒരു ടെക്കിയെ പരിചയപ്പെടുന്നത്. അയാൾ ബാംഗ്ളൂർ ജോലി ചെയ്യുന്ന സമയത്ത് കുറെയധികം തമിഴരും മലയാളികളും സുഹൃത്തുക്കളായി ഉണ്ടായിരുന്നു എന്ന് പറഞ്ഞു സംഭാഷണം തുടങ്ങിയതാണ്. കുറച്ചു മലയാളം വാക്കുകളും തമിഴ് വാക്കുകളും പഠിച്ചെന്ന് പറഞ്ഞു. പിന്നീട് ഭാഷകളും അതിലെ രസകരമായ അർത്ഥങ്ങളിലേക്കും കടന്നു.

ചില പേരുകളാണ് മടിയൻ (Lazy Boy), മുള്ളി (മൂത്രമൊഴിച്ചു), മേലെ മുള്ളി (മുകളിൽ മൂത്രമൊഴിച്ചു), മാന്തുക (നഖംകൊണ്ട് കീറുക; തോണ്ടുക (മൺവെട്ടിപോലുള്ള ആയുധംകൊണ്ട് വെട്ടാതെ ചുരണ്ടുക), പരിപ്പായി (വിത്തുണങ്ങിയാൽ പരിപ്പായി എന്ന് പറയും), മൂഞ്ചിക്കൽ (പറ്റിക്കൽ), വെള്ളമടി (മദ്യപിക്കുക), അമ്മായിയപ്പൻ (Father in law), മറന്നോടായ് (മറന്നു പോയോടാ എന്ന് ചോദിക്കുന്നതിന്റെ ചുരുക്കിയത്).

ഇങ്ങനെ ആദ്യത്തെ ചിത്രത്തിൽ കാണുന്ന ചില സ്ഥല പേരുകളുടെ അർത്ഥം രസകരമാണ്.

തിരുവനന്തപുരത്തുകാർ പരസ്പരം സംബോധന ചെയ്യുമ്പോൾ എന്തെരെടെ അപ്പി... ചായകളൊക്കെ കുടിച്ചാ എന്നൊക്കെ ചോദിക്കുമ്പോൾ അങ്ങ് വടക്ക് മലബാർ സൈഡ് കുട്ടികളുടെ മലത്തെയാണ് അപ്പി എന്നു പറയുന്നത്. ഇതേപോലെ തൻറെ അപ്പനെവിടാ എന്ന് തെക്കുള്ളവർ ചോദിച്ചാൽ താങ്കളുടെ അച്ഛൻ എവിടെ എന്നും, തൻറെ അപ്പൻ എന്നൊക്കെ വടക്കുള്ളവരോട് പറഞ്ഞാൽ അതൊരു തെറി വിളിയുമാണ്. അപ്പനെ വിളിക്കുന്നോടാ നായിൻറെ മോനെ എന്നു തിരിച്ചു വിളിക്കും. മലബാർ സൈഡിൽ പ്രായം കുറഞ്ഞവരെ നീ എന്നുവിളിക്കുമ്പോൾ തെക്കൻ സൈഡ് താൻ എന്നും വിളിക്കും. രണ്ടുപേർക്കും ഈ വിളി അങ്ങേയറ്റം ബഹുമാനക്കുറവുണ്ടാക്കുന്നതാണ്.

ജെട്ടി (Jetty)

പൊതുവേ ബോട്ട് വന്നു നിൽക്കുന്ന സ്ഥലത്തിന് ജെട്ടി എന്നാണ് പറയുന്നത്. പൊതുവേ മലയാളികൾക്ക് ജെട്ടിയെന്നു കേട്ടാൽ ആദ്യം ഓർമ്മ വരുന്നത് അണ്ടർ വിയർ (Under Wear) ആയിരിക്കും.

എറണാകുളത്ത് രണ്ട് ഫെറി പോയിൻ്റുകൾ (ജെട്ടികൾ എന്ന് വിളിക്കുന്നു) ഉണ്ട്. എറണാകുളം ബോട്ട് ജെട്ടി, ഹൈക്കോർട്ട് ബോട്ട് ജെട്ടി. തമാശയായി പറഞ്ഞാൽ എറണാകുളത്ത് വിവിധ തരം ജെട്ടികൾ ഉണ്ട്. ഇത് കൂടാതെ നേര്യമംഗലം ബോട്ട് ജെട്ടി, നീൽ ഐലന്റ് ജെട്ടി തുടങ്ങിയ വേറെയും ജെട്ടികൾ ഉണ്ട്.

ജട്ടി(Underpants)

നമ്മൾ പറയുന്ന, ഉപയോഗിക്കുന്ന ജട്ടി (Under Wear) ഇതാണ്. ലിംഗഭേദമെന്യേ ധരിക്കുന്ന അടിവസ്ത്രമാണു ജട്ടി. പൊതുവേ ഇതിന് ഇംഗ്ലീഷ് അക്ഷരമാലയിലെ 'V' എന്ന അക്ഷരത്തിന്റെ ആകൃതി ആയിരിക്കും. ഗുഹ്യഭാഗങ്ങളിലെ അമിതവിയർപ്പ് വലിച്ചെടുത്ത് ശരീരത്തെ സംരക്ഷിക്കുന്നതും ലൈംഗിക അവയവങ്ങളുടെയും മർമ്മ ഭാഗത്തിന്റെയും സംരക്ഷണമാണ് പ്രധാന ജോലി. ഷഡ്ഢി, ജെട്ടി എന്നീ പല പേരുകളിലും അറിയപ്പെടുന്നു. ഒരേ രൂപമാണെങ്കിലും സ്ത്രീക്കും പുരുഷനും ചില്ലറ വ്യത്യാസങ്ങളോടെയാണു ഇതു വിപണിയിൽ ലഭിക്കുന്നത്. പുരുഷന്മാർക്കുള്ളതു "ബ്രീഫ്"എന്നും, സ്ത്രീകൾക്കുള്ളതു "പാന്റി"എന്നും അറിയപ്പെടുന്നു.

മൈരേ

തമിഴിലെ മൈര് എന്ന പദത്തിന്റെ അർത്ഥം മലയാളത്തിൽ "മൂറുകൾ" എന്നാണ്. പക്ഷെ കാസർകോടിലെ ഒരു സ്ഥലപ്പേര് മൈരേ എന്നായിരുന്നു. തെറിപ്പേരായതുകൊണ്ട് മൈരേ പേര് മാറ്റി ഷേണിയാക്കി. തെറി കാരണം പെരുമാറിയ ഒരു നാടിന്റെ കഥ, സ്ഥലപ്പേര് മലയാളത്തിലെ സർവ്വസാധാരണമായൊരു തെറിക്ക് സമാനമായി തോന്നിയതിനാൽ കാസർകോട് ജില്ലയിലെ എൻമകജയിലെ ഈ സ്ഥലത്തിൻറെ പേര് തന്നെ സർക്കാർ ഔദ്യോഗികമായി മാറ്റിയിരിക്കുകയാണ്. മൈര് എന്നതിന് രോമം എന്നും തലമുടി എന്നൊക്കെ അർത്ഥങ്ങളുണ്ട്.

കെട്ടണ്ടപട്ടി - Kettandapatti - Thekkupattu, Tamil Nadu

"കെട്ടണ്ട പട്ടി" (നീ കെട്ടണ്ടട പട്ടി) എന്ന് മലയാളത്തിൽ വായിച്ചു പോകുന്ന ഒരു റെയിൽവേ സ്റ്റേഷന്റെ പേരാണിത്.

ദക്ഷിണ റെയിൽവേ സോണിലെ ചെന്നൈ റെയിൽവേ ഡിവിഷനിലെ NSG–6 വിഭാഗത്തിലുള്ള ഇന്ത്യൻ റെയിൽവേ സ്റ്റേഷനാണ് കെറ്റണ്ടപതി (സ്റ്റേഷൻ കോഡ്: KDY).  ചെന്നൈ നഗരപ്രാന്തത്തിൽ സ്ഥിതി ചെയ്യുന്ന ഒരു റെയിൽവേ സ്റ്റേഷനാണിത്.  ജോലാർപേട്ടാണ് ഇതിൻ്റെ ഏറ്റവും അടുത്തുള്ള പട്ടണം.

തൂറാൻ (Touran)

ഫോക്സ് വാഗന്റെ ഒരു മോഡലാണ് തൂറാൻ (TOURAN). മലയാളത്തിലെ ഉച്ചാരണത്തിൽ വരുന്ന മാറ്റം കൊണ്ടാണ് ആ കാറിനെ തൂറാൻ എന്ന് വിളിക്കുന്നത്. ട്രോളുകൾ വന്നപ്പോൾ കേരളത്തിലേക്ക് ഫോക്സ് വാഗൻ തൂറാൻ വരുന്നു എന്നുവരെ രസകരമായി അടിച്ചു വിട്ടവരുണ്ട്.

പേർഷ്യൻ പേരാണ് തൂറാൻ. ഒരു സ്ഥലപ്പേരാണത് (a place name inshahnameh)

ഒരു മീനിൻറെ പേരാണ് ഉടുപ്പൂരി (Leather Jacket Fish)

ഉടുപ്പൂരി (Leather Jacket Fish) ശാസ്ത്രീയനാമം  (Oligoplites saurus). ലെതർ ജാക്കറ്റ് ഫിഷ് (ഒലിഗോപ്ലൈറ്റ്സ് സോറസ്), ലെതർ ജാക്ക് എന്നും അറിയപ്പെടുന്നു, ഇത് കാരൻഗിഡേ കുടുംബത്തിലെ ഒരു ഇനം മീനാണ്. പൈലറ്റ് ഫിഷ് പോലെയുള്ള കാരൻഗിഡേയിലെ മറ്റ് അംഗങ്ങളെ ലെതർ ജാക്ക് സൂചിപ്പിക്കാം. ഏറ്റവും വലിയവയ്ക്ക് ഒരടിയോളം നീളമുണ്ട്. ഉടുപ്പൂരി എന്നത് വസ്ത്രം അഴിച്ചു എന്നാണ് അർത്ഥം.

പോണ്ട

പോണ്ട (ഗോവ ജില്ലയിലെ ഒരു നഗരവും മുനിസിപ്പൽ കൗൺസിലുമാണ്. ഗോവയിലെ സെൻട്രൽ പ്രദേശത്താണ് പോണ്ട. പോണ്ടയുടെ നിരവധി പ്രശസ്തമായ ക്ഷേത്രങ്ങളും പ്രദേശത്തിൻ്റെ സമ്പന്നമായ സാംസ്കാരിക പൈതൃകവും കാരണം "അൻട്രൂസ് മഹൽ" എന്നും അറിയപ്പെടുന്നു. കാസർകോട് കണ്ണൂർ ജില്ലകളിൽ പോണ്ട എന്നത് പോവരുത് എന്ന അർത്ഥത്തിൽ ആണ്. നീ ആട പോണ്ട (നീ അവിടെ പോകരുത്).

പുല്ല്

കമ്മീഷണർ സിനിമയിൽ വിജയരാഘവൻ പറയുന്ന പഞ്ച് ഡയലോഗായിരുന്നു പോ പുല്ലേ.... പുല്ല് എന്നത് വെറുമൊരു മണ്ണിൽ ചെറിയൊരു ഉയരത്തിൽ മുളച്ചു പൊന്തുന്ന സസ്യമാണെന്നത് ഏവർക്കും അറിയാം. അതിനെയാണ് ഇത്രേം വല്ല്യൊരു സംഭവമാക്കിയത്. പോടാ പുല്ലേ എന്നുദ്ദേശിക്കുന്നത് നീ പോയി നിൻറെ പണി നോക്ക് എന്നെ ചൊറിയാൻ വരണ്ട എന്നർത്ഥത്തിലാണ്. അതിലൊരു പുച്ഛവും കലർന്നിട്ടുണ്ട്.

ഇതേ സിനിമയിലെ മറ്റൊരു തെറിയാണ് പുലയാടി. പൊലയാടി മോനെ (പുലയാടി മോനെ) എന്ന് തെറിയായി വിളിക്കുന്നവരുണ്ട്. പുലയാടി വ്യഭിചാരിണി എന്നും മലയാളത്തിൽ അർത്ഥമുണ്ട്. ഇത്തരത്തിൽ പുലയർ തൊട്ട് അശുദ്ധമാക്കി ജാതി ഭ്രഷ്ടായ സ്ത്രീകളെ പുലയാടി എന്നു വിളിച്ചു വന്നു. പുലയർ എന്നത് ഒരു ജാതിയാണ്. ദക്ഷിണേന്ത്യൻ സംസ്ഥാനങ്ങളിലെ ദളിത് വിഭാഗത്തിൽ പെട്ട ഒരു പ്രബല സമുദായമാണ് പുലയർ (ചെറുമർ, ചെറുമക്കൾ). കർണ്ണാടകത്തിൽ ഇവർ ഹോളയ എന്നാണ് അറിയപ്പെടുന്നത്. കേരളത്തിൽ പ്രാചീനകാലത്ത് രാജ്യാധികാരം കയ്യാളിയിരുന്നത് ഈ സമുദായക്കാരായിരുന്നു എന്നു ചരിത്രകാരന്മാർ അഭിപ്രായപ്പെടുന്നു. ആദി ദ്രാവിഡ വർഗ്ഗത്തിൽ പെടുന്ന ആസ്റ്റ്രോലോയിഡ് വംശമാണിവർ. ഈ പുലയരെ ആണ് പുലയാടി മക്കൾ എന്ന് വിളിക്കുന്നത്. ജാതികളുടെ മുത്തച്ഛന്മാർ ചേരമർ (പുലയർ) എന്നും പറയുന്നുണ്ട്.

"പുലയാടി മക്കൾക്ക് പുലയാണ് പോലും" എന്നൊരു വിവാദ ഗാനം 2022 ൽ ഇറങ്ങിയ ഭാരത സർക്കസ് എന്ന സിനിമയിലുണ്ട്.

ഇതിൽ തന്നെ വേറെയും വാക്കുകൾ ഉണ്ട്. എന്ത് പന്നത്തരമാടോ (എന്ത് വൃത്തികേടാടോ താൻ കാണിച്ചത്) താൻ കാണിച്ചത്? എന്ന് എൻ.എഫ്.വർഗ്ഗീസ് ചോദിക്കുന്നുണ്ട്.

പന്ന ഇന്ത്യൻ സംസ്ഥാനമായ മദ്ധ്യപ്രദേശിലെ പന്ന ജില്ലയിലുൾപ്പെട്ട ഒരു പട്ടണവും മുനിസിപ്പാലിറ്റിയുമാണ്. ഈ പട്ടണം ഇവിടുത്തെ രത്നഖനികളാൽ പ്രസിദ്ധമായിരിക്കുന്നു. പന്ന ജില്ലയുടെ ഭരണസിരാ കേന്ദ്രമാണീ പട്ടണം. 

പന്ന എന്നപേരിൽ കൊളംബിയൻ സ്റ്റോണുമുണ്ട്  (Panna Stone Colombian Gemstone). എമറാൾഡ് (പന്ന) എമറാൾഡ് ബെറിൽ മിനറൽ കുടുംബത്തിൽപ്പെട്ട, പച്ച നിറമുള്ള, വളരെ വിലയേറിയ രത്നമാണ്. വേദ ജ്യോതിഷത്തിലെ ഏറ്റവും പ്രശസ്തമായ രത്നങ്ങളിൽ ഒന്നാണിത്

നീ കണ്ടവൻറെയൊക്കെ തിണ്ണ നിരങ്ങിക്കോ. ഈട്ത്തെ കാര്യക്കെ നിന്റൊൾക്ക് ഒറ്റക്ക് പാറ്റ്വോ  (നീ അന്യരുടെ വീട്ടിലൊക്കെ പോവുന്നതൊക്കെ കൊള്ളാം, ഇവിടത്തെ കാര്യങ്ങൾ നോക്കാൻ നിൻറെ ഭാര്യയ്ക്ക് ഒറ്റയ്ക്ക് കഴിയുമോ). തിണ്ണ എന്നത് വരാന്തയാണ്. അഥവാ, പഴയ വീടിൻറെ ചായ്പ്പ്.

കൂത്തിച്ചി മോളെ എന്ന് തെറി വിളിക്കാറുണ്ട്. കൂത്താടി നടക്കുന്നവൾ എന്നാണ് ഉദ്ദേശിക്കുന്നത്. നർത്തകി. വ്യഭിചാരിണി, വേശ്യ എന്നീ നാനാർത്ഥങ്ങളുമുണ്ട്. കൂത്തിച്ചിമോൻ = വേശ്യാപുത്രൻ (ശകാരവാക്ക്).

ഭരണിപ്പാട്ട്

കൊടുങ്ങല്ലൂർ ഭരണി, കാവ് തീണ്ടൽ നടക്കുന്ന അശ്വതി നാളിലാണു ഭരണിപ്പാട്ട്.

വിശ്വ വിഖ്യാത തെറി

ചരിത്രത്തിൽ ആദ്യമായി ഒരു കോളജ് മാഗസിൻ പുസ്തകമായി. ഗുരുവായൂരപ്പൻ കോളേജിലെ വിദ്യാർത്ഥികളാണ് കോളേജ് മാഗസിന് വിശ്വ വിഖ്യാത തെറി എന്ന പേര് നൽകിയത്. സവർണബോധം അരികുജീവിതങ്ങളെ അധിക്ഷേപിക്കാൻ തുപ്പുന്ന ‘ചെറ്റ’പോലുള്ള തെറിവാക്കുകൾക്കു പിന്നിൽ ഒളിഞ്ഞിരിക്കുന്ന അധികാരത്തിന്റെ വിധ്വംസകതയും കീഴാളവിരുദ്ധതയും അടയാളപ്പെടുത്തുന്ന കവർസ്റ്റോറിയാണ് മാഗസിന്റെ പ്രധാന ഹൈലൈറ്റ്. തെറികളുടെ ചരിത്രം ചികഞ്ഞുപോകുമ്പോൾ ജാതീയമായ ഉച്ചനീചത്വങ്ങളിലേക്കും, എക്കാലത്തും പ്രബലമായ സവർണ ബോധത്തിലേക്കും നാമെത്തുന്നുവെന്ന് ഇത് ഓർമിപ്പിക്കുന്നു..

തെറിക്കുത്തരം മുറി പത്തൽ എന്നാൽ മുഖത്തടിച്ചതുപോലെ പറയുന്നതിനെ ഇങ്ങനെ പറയാറുണ്ട്. അവൻറെ അണ്ണാക്കിനിട്ട് കൊടുക്ക് എന്ന് പറയാറുണ്ട്. ഇങ്ങോട്ട് പറഞ്ഞതിൻറെ ഇരട്ടിയായി തിരിച്ചു പിന്നീടൊന്നും പറയാൻ പറ്റാത്ത രീതിയിൽ മറുപടി കൊടുക്കണമെന്നാണുദ്ദേശിക്കുന്നത്.

"ആലപ്പുഴയിൽ പുഴയുണ്ടെന്നാൽ ആലപ്പുഴയൊരു പുഴയല്ല.

എറണാകുളത്ത് കുളമുണ്ടെന്നാൽ എറണാകുളമൊരു കുളമല്ല.

കോഴിക്കോടിൽ കൊഴിയുണ്ടെന്നാൽ കോഴിക്കോടൊരു കോഴിയല്ല.

മലപ്പുറത്ത് മലയുണ്ടെന്നാൽ മലപ്പുറമൊരു മലയല്ല.

വയലാംകുഴിയിൽ കുഴിയുണ്ടെന്നാൽ വയലാംകുഴിയൊരു കുഴിയല്ല."

NB: ഇങ്ങനെ നിങ്ങൾക്കറിയാവുന്ന രസകരമായ വാക്കുകളും ചിത്രങ്ങളും കമന്റായി നൽകിയാൽ എഡിറ്റ് ചെയ്തു ഈ ലേഖനം വിപുലീകരിക്കാൻ പറ്റും.

© മോഹൻദാസ് വയലാംകുഴി

#storiesofwords #words #abusewords #censorship #censorwords #theri 

നേപ്പാളെന്ന സ്വപ്ന ഭൂമിയിലേക്കൊരു യാത്ര...

 

കുട്ടി മാമാ... ഞാൻ ഞെട്ടി മാമാ...

നേപ്പാളെന്നു കേൾക്കുമ്പോൾ ആദ്യം നാവിൻ തുമ്പിൽ വരുന്ന ഡയലോഗാണിത്...

അക്കൊസേട്ടനും, അപ്പുക്കുട്ടനും, അശ്വതിയും, (മോഹൻലാൽ, ജഗതി ശ്രീകുമാർ, മാധു) ഉണ്ണികുട്ടനും (റിമ്പോച്ചി- സിദ്ധാർത്ഥ് ലാമ)    സ്വയംഭൂനാഥ് ക്ഷേത്രത്തിൻറെ പടിക്കെട്ടുകളൊക്കെ ആർക്കാണ് മറക്കാൻ പറ്റുക...

32 വർഷമായിട്ടും ആളുകൾ യോദ്ധ സിനിമയെയും നേപ്പാളിനേയും നെഞ്ചിലേറ്റി നടക്കുമ്പോൾ നേപ്പാളെന്ന സ്വപ്ന ഭൂമിയിലേക്കൊരു യാത്ര പോവാൻ കൊതിക്കാത്തവരായി ആരുണ്ടാകും. ഹിമാലയൻ പർവ്വത നിരകളുടെ താഴ്വര, ബുദ്ധ വിഹാരങ്ങളുടെ കേന്ദ്രം, സാംസ്കാരിക വൈവിധ്യം നെഞ്ചിലേറ്റി നടക്കുന്ന പൈതൃക നഗരങ്ങൾ... ഇങ്ങനെ പോകുന്നു നേപ്പാളെന്ന രാജ്യത്തിൻറെ വിശേഷങ്ങൾ.

നേപ്പാളിലേക്ക് യാത്ര പോകാൻ കൊതിക്കുന്നവർക്ക് ഇനി തുടർന്നു വായിക്കാം...

ഇന്ത്യക്കാരായ നമുക്ക് നമ്മുടെ പാസ്സ്‌പോർട്ട് ഉപയോഗിച്ച് 57 രാജ്യങ്ങളിലേക്ക് വിസയില്ലാതെ യാത്ര ചെയ്യാമെന്ന് എത്രപേർക്കറിയാം.?*

നേപ്പാളിലേക്ക് യാത്ര ചെയ്യാൻ പാസ്‌പോർട്ടും വിസയും ഒന്നും വേണ്ട. ആധാർ കാർഡോ, വോട്ടർ ഐഡി കാർഡോ കയ്യിലുണ്ടെങ്കിൽ നേപ്പാളിൽ പോയി വരാം.

കേരളത്തിൽ നിന്ന് നേപ്പാളിലേക്ക് പോകുന്നവർക്ക് രണ്ടു വഴികളാണുള്ളത്. ഒന്ന് തിരുവനന്തപുരത്തു നിന്ന് പുറപ്പെടുന്ന രപ്തിസാഗർ എക്സ്പ്രെസ്സിൽ ഘോരഖ് പൂർ റെയിൽവേ സ്റ്റേഷനിൽ ഇറങ്ങി സൊനൗലി ഇൻഡോ നേപ്പാൾ അതിർത്തിവരെ ടാക്സിയിലോ, ബസ്സിലോ പോകാം. ഏകദേശം 97 കിലോമീറ്റർ ബസ്സിലോ ടാക്സിയിലോ യാത്ര ചെയ്യണം.  അതിർത്തിയിലെ ചെക്കിങ്ങ് കഴിഞ്ഞു ബസ്സിലോ ടാക്സിയിലോ കഠ്മണ്ഡുവിലേക്ക് പോകാവുന്നതാണ്.  അതിർത്തിയിൽ നിന്ന് വീണ്ടും ഏകദേശം 264 കിലോമീറ്റർ കഠ്മണ്ഡു ബസ് സ്റ്റാന്റിലേക്കുണ്ട്.

ഡൽഹി വഴി പോകുന്നവർക്ക് റക്സോൾ ജംഗ്ഷൻ റെയിൽവേ സ്റ്റേഷനിൽ ഇറങ്ങി (Raxaul Junction Railway Station) ഇൻഡോ നേപ്പാൾ അതിർത്തിവരെ ടാക്സിയിലോ, ടുക്ക് ടുക്ക് വണ്ടി എന്നുവിളിക്കുന്ന കുതിര വണ്ടിയിലോ, മുച്ചക്ര വാഹനത്തിലോ, ഓട്ടോയിലോ പോയി, അതിർത്തിയിലെ ചെക്കിങ്ങ് കഴിഞ്ഞു ബസ്സിലോ ടാക്സിയിലോ നേപ്പാൾ അതിർത്തിവരെ പോകാവുന്നതാണ്. അവിടെ നിന്ന് ബസ്സിൽ കഠ്മണ്ഡുവിലേക്ക് പോകാം. ഏകദേശം 153 കിലോമീറ്റർ കഠ്മണ്ഡു ബസ് സ്റ്റാന്റിലേക്കുണ്ട്.

രണ്ടു അതിർത്തിയിൽ നിന്നായാലും ഏകദേശം 600 അല്ലെങ്കിൽ 700 നേപ്പാളി രൂപയാണ് ടിക്കറ്റ് ചാർജ്.

നേപ്പാൾ അതിർത്തിയിൽ നിന്നും കഠ്മണ്ഡുവിലേക്ക് ബസ്സിൽ പോകുമ്പോൾ മനസ്സിലാക്കേണ്ട കുറച്ചു കാര്യങ്ങൾ ഉണ്ട്. അതിലൊന്ന് നമ്മുടെ നാട്ടിലെ പോലുള്ള റോഡ് അല്ല. ഓരോ മലകൾ താണ്ടിയാണ് ബസ്സ് സഞ്ചരിക്കുന്നത്. നല്ല റോഡുകൾ വളരെ കുറവായതിനാൽ ഏകദേശം 16 മണിക്കൂറിലധികം ബസ്സിൽ ഇരിക്കേണ്ടതായി വരും. ഓഫ് റോഡ് യാത്രയുമാണ്. അതുകൊണ്ടു തന്നെ തുടർച്ചയായി ഇരുന്ന് യാത്ര ചെയ്യാൻ ബുദ്ധിമുട്ടുള്ളവർ കാഠ്മണ്ഡുവിലേക്ക് വിമാനയാത്ര തിരഞ്ഞെടുക്കുന്നതാവും ഉചിതം. നേപ്പാൾ ബോർഡർ രാത്രി 10 മണിക്ക് മുമ്പ് അടയ്ക്കും. അതുകൊണ്ടുതന്നെ 10 മണിക്ക് മുമ്പായി അതിർത്തിയിൽ ചെന്ന് ചെക്കിങ്ങ് കഴിഞ്ഞു പോകുന്നത് ഗുണകരമായിരിക്കും. അല്ലെങ്കിൽ രാവിലെവരെ കാത്തിരിക്കേണ്ടതായി വരും. അതിർത്തിയിൽ ചിലവുകുറഞ്ഞ താമസ സൗകര്യങ്ങൾ ലഭ്യമാണ്.

ഈ രണ്ടു അതിർത്തികൾ കൂടാതെ വേറെയും 4 അതിർത്തികൾ ഉണ്ട്. ഉത്തരാഖണ്ഡ് (ബൻബാസ), ഉത്തർ പ്രദേശ് (സൊനൗലി), ബിഹാർ (റക്സോൾ), വെസ്റ്റ് ബംഗാൾ (ലാൻറ് പോർട്ട് പനിതാങ്കി), സിക്കിം (സിങ്കലില റേഞ്ച്)  എന്നിവയാണ് 6 അതിർത്തികൾ.

ലുംബിനി

പശ്ചിമ നേപ്പാളിലെ രുപന്ദേഹി ജില്ലയിൽ സ്ഥിതിചെയ്യുന്ന ഒരു ബുദ്ധമത തീർത്ഥാടനഭൂമിയാണ് ലുംബിനി (Lumbini). ഇവിടെവെച്ചാണ് മഹാറാണി മായാദേവി സിദ്ധാർത്ഥ ഗൗതമന് ജന്മം നൽകിയത്. പിൽകാലത്ത് ശ്രീ ബുദ്ധനായി മാറി ബുദ്ധമതം സ്ഥാപിച്ച സിദ്ധാർത്ഥൻ ക്രിസ്തുവിന് മുമ്പ് 623-നും 543-നും ഇടയിലാണ് ജീവിച്ചിരുന്നത്. ശ്രീബുദ്ധനുമായി അഭേദ്യമായി ബന്ധപ്പെട്ടിരിക്കുന്ന നാല് പുണ്യസ്ഥലങ്ങളിൽ ഒന്നാണ് ലുംബിനി. സിദ്ധാർത്ഥ ഗൗതമന് ജ്ഞാനോദയമുണ്ടായ ബുദ്ധ ഗയ, ശ്രീബുദ്ധൻ ആദ്യമായി ധർമ്മപ്രഭാഷണം നടത്തിയ സാരാനാഥ്, അദ്ദേഹം നിർവാണം പ്രാപിച്ച കുശിനഗരം എന്നിവയാണ് മറ്റ് മൂന്ന് പുണ്യകേന്ദ്രങ്ങൾ.

ബുദ്ധന്റെ കാലഘട്ടത്തിൽ കപിലവസ്തുവിനും ദേവദഹയ്ക്കും ഇടയിലായിലുള്ള പ്രദേശമായിരുന്നു ലുംബിനി. പിൽകാലത്ത് അശോകചക്രവർത്തി ഈ പ്രദേശം സന്ദർശിക്കുകയുണ്ടായി. അതിന്റെ സ്മരണാർത്ഥം പണികഴിപ്പിച്ച ലുംബിനിയിലെ അശോകസ്തംഭം ഇതിന്റെ തെളിവാണ്.

1997മുതൽ ലുംബിനി യുനെസ്കോയുടെ ലോകപൈതൃക കേന്ദ്രങ്ങളിൽ ഒന്നാണ്. നിരവധി ബുദ്ധമഠങ്ങളും ബുദ്ധക്ഷേത്രങ്ങളും ഇന്ന് ഇവിടെ കാണപ്പെടുന്നു.

സൊനൗലിയിൽ നിന്ന് 26 കിലോമീറ്ററും റക്സോളിൽ നിന്ന് ഏകദേശം 230 കിലോമീറ്ററും ലുംബിനിയിലേക്കുണ്ട്.

കാഠ്മണ്ഡുവാണ് നേപ്പാളിൻ്റെ തലസ്ഥാനമെന്ന് എല്ലാവർക്കും അറിയാവുന്ന കാര്യമാണ്. അവിടെയാണ് യോദ്ധാ സിനിമയിലെ പല സീനുകളും ചിത്രീകരിച്ചിരിക്കുന്നത്. 

കാഠ്മണ്ഡു

നേപ്പാളിന്റെ തലസ്ഥാനമാണ് കാഠ്മണ്ഡു (Kathmandu) . മദ്ധ്യ നേപ്പാളിൽ ശിവപുരി, ഫൂൽചൗക്ക്, നഗാർജ്ജുൻ, ചന്ദ്രഗിരി എന്നീ നാലു മലകൾക്ക് നടുവിലായി ഒരു കോപ്പയുടെ ആകൃതിയിലുള്ള താഴ്‌വരയിൽ സമുദ്രനിരപ്പിൽനിന്നും 1,400 മീറ്റർ (4,600 ft) ഉയരത്തിലായാണ് ഈ നഗരം സ്ഥിതിചെയ്യുന്നത്.

ദർബാർ ചത്വരത്തിലെ "കാഷ്ഠമണ്ഡപം" എന്നറിയപ്പെടുന്ന നിർമ്മിതിയിൽനിന്നാണ് കാഠ്മണ്ഡു എന്ന പേര് ഉദ്ഭവിച്ചിരിക്കുന്നത്. സ്ംസ്കൃതത്തിൽ കാഷ്ഠ(काष्ठ) എന്നാൽ മരം എന്നാണർത്ഥം. കാഷ്ഠമണ്ഡപമെന്നാൽ തടിയിൽ തീർത്ത മണ്ഡപം. കാഠ്മണ്ഡു ദർബാർ ചത്വരത്തിൽ സ്ഥിതിചെയ്യുന്ന കാഷ്ഠമണ്ഡപത്തിന് രണ്ട് നിലകളാണുള്ളത്. പൂർണമായും മരത്തിൽ മാത്രം നിർമ്മിച്ചിരിക്കുന്ന ഈ മണ്ഡപത്തിൽ ഇരുമ്പാണി എവിടെയും ഉപയോഗിച്ചിട്ടില്ല.

സ്വയംഭൂനാഥ്

(സ്വയംഭൂനാഥ ക്ഷേത്രം വാനരക്ഷേത്രം അഥവാ Swoyambhunath Monkey Temple)

നേപ്പാളിലെ കാഠ്മണ്ഡു താഴ്വരയിലെ ഒരു കുന്നിന്മേൽ സ്ഥിതിചെയ്യുന്ന പ്രാചീന ബുദ്ധമതകേന്ദ്രമാണ് (Swoyambhu Mahachaitya). സ്വയംഭൂനാഥ ക്ഷേത്രം, സ്വയംഭൂനാഥ സ്തൂപം, അനവധി ചെറുക്ഷേത്രങ്ങൾ തുടങിയവ കൂടിച്ചേർന്നതാണ് സ്വയംഭൂനാഥ്. സ്വയംഭൂനാഥ ക്ഷേത്രം വാനരക്ഷേത്രം എന്നപേരിലും അറിയപ്പെടുന്നു.ക്ഷേത്രത്തിന്റെ വടക്കുപടിഞ്ഞാറൻ ഭാഗത്തായ് അതിവസിക്കുന്ന വാനരന്മാർ

മൂലമാണ് ക്ഷേത്രത്തിന് ഇങ്ങനെ ഒരു പേര് ലഭിച്ചത്. കുരങ്ങന്മാരെ ഇവിടെ പവിത്രമായ ജീവിയായാണ് കണക്കാക്കുന്നത്. ഇവിടെയാണ് യോദ്ധ സിനിമയുടെ ചില ഭാഗങ്ങൾ ചിത്രീകരിച്ചിരിക്കുന്നത്.

നേപ്പാളിലെ വളരെ പഴക്കംചെന്ന ബുദ്ധമതകേന്ദ്രങ്ങളിൽ ഒന്നാണ് സ്വയംഭൂനാഥ്. ഗോപാലരാജവംശാവലിയിൽ പറയുന്നതനുസരിച്ച്, നേപ്പാൾ രാജാവായിരുന്ന മാനവേന്ദ്രന്റെ പ്രപിതാമഹൻ വൃഷദേവൻ 5-ആം നൂറ്റാണ്ടിൽ പണിതീർത്തതാണ് ഈ സ്ഥലം. സ്വയംഭൂനാഥിലെ സ്തൂപം ഒരു വെളുത്ത അർധകുംഭകത്തിന്മേലാണുള്ളത്. അർധകുംഭകത്തിന്റെ മുകളിൽ ഘനാകാരമുള്ള സ്തൂപത്തിൽ നാലുദിക്കിലേക്കും ദർശനമായി, ഭഗവാൻ ബുദ്ധന്റെ നേത്രങ്ങൾ ആലേഖനം ചെയ്തിരിക്കുന്നു.

പശുപതിനാഥ ക്ഷേത്രം (Pashupatinath Temple)

നേപ്പാളിന്റെ തലസ്ഥാനമായ കാഠ്മണ്ഡുവിൽ സ്ഥിതിചെയ്യുന്ന വിശ്വപ്രസിദ്ധമായ ശിവക്ഷേത്രമാണ് പശുപതിനാഥ ക്ഷേത്രം. ഭാഗ്മതി നദിയുടെ തീരത്തെ ഈ ക്ഷേത്രം നേപ്പാളിലെ ഏറ്റവും പവിത്രമായ ശിവാലയമായാണ് കണക്കാക്കുന്നത്. നേപ്പാളിലെതന്നെ വളരെ പഴക്കംചെന്ന ശിവക്ഷേത്രങ്ങളിൽ ഒന്നാണ് പശുപതിനാഥ ക്ഷേത്രം. ക്ഷേത്രം നിർമ്മിക്കപ്പെട്ട വർഷത്തെക്കുറിച്ച് വ്യക്തമായ അറിവില്ല. ക്രിസ്തു വർഷം 400 ആണ്ടിലാണ് ഈ ക്ഷേത്രം നിർമ്മിക്കപ്പെട്ടത് എന്ന് പൊതുവെ കരുതുന്നു. പശുപതിനാഥഭാവത്തിലുള്ള ശിവനാണ് ഇവിടെ പ്രതിഷ്ഠ. ജീവികളുടെ സംരക്ഷകൻ എന്നാണ് പശുപതി എന്ന വാക്കിനർത്ഥം (പശൂനാം പതി = പശുപതി; പശു= മൃഗങ്ങൾ, ജീവികൾ). ക്ഷേത്രോൽപ്പത്തിയെ കുറിച്ച് നിരവധി ഐതിഹ്യങ്ങളുണ്ട്. ഇന്ത്യയിലെ വാരാണാസിയിലെ കാഴ്ചകൾക്ക് തുല്യമാണിവിടം. പശുപതിനാഥ് ക്ഷേത്രത്തിൻറെ പിറകിൽ കൂടി ഒഴുകുന്ന ഭാഗ്മതി നദിയുടെ ഇരുകരകളിലായി മരിച്ചവരെ ദഹിപ്പിക്കുന്നത് കാണാം. അർദ്ധ നഗ്നരായ അഘോരി സന്യാസികളും ഇവിടത്തെ കാഴ്ചയാണ്.

ചന്ദ്രഗിരി ഹിൽ (Chandragiri Hills)

തങ്കോട്ടിൽ നിന്ന് ഏഴ് കിലോമീറ്റർ അകലെയുള്ള ചന്ദ്രഗിരി ഹിൽ (Chandragiri Hills), സമുദ്രനിരപ്പിൽ നിന്നും 2551 മീറ്റർ ഉയരമുള്ള കാഠ്മണ്ഡു താഴ്വരയുടെ തെക്ക്-പടിഞ്ഞാറ് ഭാഗത്താണ് കിടക്കുന്നത്. ഹിന്ദു, ബുദ്ധ മതങ്ങളുമായി ഈ മലനിരകൾ ബന്ധപ്പെട്ടിരിക്കുന്നു. അന്നപൂർണ്ണ മുതൽ എവറസ്റ്റ് വരെയുള്ള ഹിമാലയൻ മലനിരകൾ കാഠ്മണ്ഡു താഴ്വരയുടെയും ഹിമാലയൻ 

പർവതങ്ങളുടെയും മനോഹര ദൃശ്യം ഇവിടെ കാണാം. കാഠ്മണ്ഡുവിലെ നാല് പാസുകളിൽ ഒന്നാണ് ചന്ദ്രഗിരി ഹിൽ. ശിവന്റെ ഭാലേശ്വർ മഹാദേവക്ഷേത്രം കുന്നിൻമുകളിലാണ് സ്ഥിതി ചെയ്യുന്നത്. കാഠ്മണ്ഡു വാലിക്ക് അടുത്തായി തുറന്ന ട്രെക്കിങ്ങ് പാതകാണപ്പെടുന്നു. അടുത്തകാലത്ത് ആരംഭിച്ച ചന്ദ്രഗിരി ഹൈക്കിംഗ് ട്രെയ്ൽ. കേബിൾ കാർ എന്നീ ഗതാഗത സൌകര്യം ലഭ്യമാണ്.

ത്രിഭുവൻ അന്താരാഷ്ട്ര വിമാനത്താവളം (Tribhuvan International Airport)

നേപ്പാളിലെ കാഠ്മണ്ഡുവിൽ സ്ഥിതി ചെയ്യുന്ന അന്താരാഷ്ട്ര വിമാനത്താവളമാണ് ത്രിഭുവൻ അന്താരാഷ്ട്ര വിമാനത്താവളം. 

കാഠ്മണ്ഡുവിലേക്ക് വിമാന മാർഗ്ഗം പോകാൻ ആഗ്രഹിക്കുന്നവർ ത്രിഭുവൻ അന്താരാഷ്ട്ര വിമാനത്താവളത്തിലാണ് ഇറങ്ങേണ്ടത്. വിമാന മാർഗ്ഗം പോകുന്നുണ്ടെങ്കിലും ഇന്ത്യക്കാർക്ക് പാസ്സ്‌പോർട്ട് ആവശ്യമില്ല. മുകളിൽ പറഞ്ഞിരിക്കുന്നത് പോലെ ആധാർ കാർഡോ വോട്ടർ ഐഡി കാർഡോ മതിയാകും.

കാഠ്മണ്ഡു ദർബാർ സ്ക്വൊയർ (Kathmandu Durbar Square)

യുനെസ്കോയുടെ പൈതൃക സ്ഥാനം ലഭിച്ച നേപ്പാളിൽ സ്ഥിതിചെയ്യുന്ന കാഠ്മണ്ഡു താഴ്വരയിലെ മൂന്ന് ദർബാർ സ്ക്വൊയറുകളിൽ ഒന്നാണ്   കാഠ്മണ്ഡു ദർബാർ സ്ക്വൊയർ (Basantapur Darbar Kshetra) ഇത് കാഠ്മണ്ഡു കിംങ്ഡത്തിലെ റോയൽ പാലസ്സിന് മുമ്പിലായി സ്ഥിതിചെയ്യുന്നു. ഈ നഗരം മുഴുവൻ ഭരിച്ചിരുന്ന, മാള, ഷാഹ് രാജാക്കന്മാരുടെ കൊട്ടാരം അടങ്ങുന്ന സ്ഥലമാണ് ദർബാർ സ്ക്വൊയർ. ഈ പ്രദേശത്തേയും ഉൾപ്പെടുത്തിയിട്ടുള്ള ചതുരം ചതുർഭുജ രീതിയിലാണ്, അവിടെ ക്ഷേത്രങ്ങളും, മുറ്റവുമുണ്ട്. ഇത്, ശ്രീരാമന്റെ ഭക്തനായ ഹനുമാനിനെ പ്രതിഷ്ടയായി വച്ചിരിക്കുന്ന, ഹനുമാൻ ദോക്ക ദർബാർ സ്ക്വൊയർ എന്നറിയപ്പെടുന്നു. പാലസ്സിന്റെ മുന്നിലായി ഈ ചതുരം സ്ഥിതിചെയ്യുന്നു.

ഭക്തപൂർ ദർബാർ സ്ക്വയർ (Bhaktapur Durbar Square)

ഭക്തപൂർ കിംങ്ഡത്തിലെ റോയൽ പാലസ്സിന് മുമ്പിലായുള്ള ഒരു വിപണിസ്ഥലമാണ് ഭക്തപൂർ ദർബാർ സ്ക്വയർ. ഇത് സമുദ്രനിരപ്പിൽ നിന്ന് 1400 മീറ്റർ ഉയരത്തിലാണ് സ്ഥിതിചെയ്യുന്നത്.

നേപ്പാളിൽ സ്ഥിതിചെയ്യുന്ന കാഠ്മണ്ഡു താഴ്വരയിലെ മൂന്ന് ദർബാർ സ്ക്വൊയറുകളിൽ ഒന്നുകൂടിയാണ് ഇത്, അവ് മൂന്നും യുനെസ്കോയുടെ പൈതൃക സ്ഥാനം നേടിയവയാണ്. ബോദ്ഗോവൻ എന്നറിയപ്പെടുന്ന ഭഗത്പൂർ നഗരത്തിൽ തന്നെയാണ് ഭക്തപൂർ ദർബാർ സ്ക്വയർ സ്ഥിതിചെയ്യുന്നത്.

കാഠ്മണ്ഡുവിന്റെ കിഴക്ക് 13 കിലോമീറ്റർ വരെ ഈ ദർബാർ സ്ക്വൊയർ വ്യാപിച്ചുകിടക്കുന്നു. ഈ ചതുരത്തിന് ഉപചതുരങ്ങളായി നാല് ചതുരങ്ങൾ കൂടിയുണ്ട് (ദർബാർ സ്ക്വൊയർ, തോമദി സ്ക്വൊയർ, ദറ്റാത്രേയ സ്ക്വൊയർ, പോട്ടെറി സ്ക്വൊയർ) അവയടങ്ങുന്ന മുഴുവൻ പ്രദേശത്തെ ബഗത്ത്പൂർ ദർബാർ സ്ക്വൊയർ എന്നറിയപ്പെടുന്നു, കൂടാതെ ഇതുതന്നെയാണ് കാഠ്മണ്ഡു താഴ്വരയിൽ ഏറ്റവും സന്ദർശകരുള്ള ഒരു ഇടം.

55 ജനാലകളുള്ള കൊട്ടാരം

എ.ഡി 1427-ൽ ഭരിച്ചിരുന്ന യക്ഷ മാള എന്ന രാജാവിന്റെ കാലത്താണ്  55 ജനാലകളുള്ള കൊട്ടാരം നിർമ്മിക്കപ്പെടുന്നത്,  ഇതിനെ 17-ാം നൂറ്റാണ്ടിലെ ബൂപതിന്ദ്ര മാളയുടെ കാലത്ത് പുനഃനിർമ്മിക്കുകയും ചെയ്തു. മതിൽക്കെട്ടുകൾക്കപ്പുറമുള്ള, ശ്രേഷ്ഠമായ ശിലാ നിർമ്മാണങ്ങളുടെ ആലേഖന രീതിയും, 55 ജനാലകളുള്ള ബാൽക്കണിയും, അതുല്യമായ മരപ്പണിയിലെ മാസ്റ്റർപീസുകളായി അറിയപ്പെടുന്നു.

സ്വർണ്ണപ്പടിവാതിൽ 

ബഗത്പൂരിലെ ലോകപ്രശ്തമായ സ്വർണ്ണപ്പടിവാതിൽ.

ലോകത്തിൽവച്ച്  വളരെ മനോഹരമായതും,അത്യധികം വിലപിടിപ്പുള്ള വസ്തുക്കളാൽ നിർമ്മിതവുമായ ഒരു പടിവാതിലാണ്  ലു ദോവ്ക്ക (സ്വർണ്ണപ്പടിവാതിൽ. ഈ പടിവാതിലിൽ ഹിന്ദു മതത്തിലെ ദേവതകളായ കാളിയേയും, ഗരുഡനേയും പ്രതിഷ്ടിച്ചിരിക്കുന്നു, കൂടാതെ രണ്ട് ജലകന്യകകളും ഇവിടെയുണ്ട്. ഈ പടിവാതിലിനെ രാക്ഷസന്മാരെകൊണ്ടും, ഹിന്ദു മതത്തിലെ വിശ്വാസപരമായ സങ്കീർണത നിറഞ്ഞ ജീവികളെകൊണ്ടും അലങ്കരിച്ചിരിക്കുന്നു. ഇംഗ്ലീഷ് കലാനിരൂപകനും, ചരിത്രകാരനുമായ പേഴ്സി ബ്രൗൺ ഈ സ്വർണ്ണപടിവാതിലിനെക്കുറിച്ച് പറഞ്ഞതിതാണ്, "ഈ മുഴുവൻ രാജ്യത്തിലേയും കലയിലെ ഏറ്റവും ശ്രേഷ്ഠമായ ഒന്ന് ; എണ്ണിതിട്ടപ്പെടുത്തനാവാത്ത വിധമുള്ള ഭംഗിയാർന്ന മുഖങ്ങളുടെ നിരകൾ, അതിന്റെ പിന്നിലെ പശ്ചാത്തലത്താൽ ഒരു രത്നംപോലെ തിളങ്ങുന്നു." ഈ പടിവാതിൽ നിർമ്മിച്ചത് രഞ്ജിത്ത് മാള രാജാവായിരുന്നു, കൂടാതെ ഇത് 55 ജനാലകളുള്ള കൊട്ടാരത്തിന്റെ മുറ്റത്തേക്കുള്ള വഴിയുമാണ്.

സിംഹപ്പടിവാതിൽ

ഇത്തരം അത്ഭുതപരമായ രീതിശാസ്ത്രത്തോടുകൂടിയ പടിവാതിലുകളുടെ നിർമ്മാണം നടത്തിയത് കൈവേലക്കാരായിരുന്നു, എന്നാൽ ബഗദോൺ രാജാവ് അവരുടെ കൈകളെല്ലാം വെട്ടിമാറ്റിയതിനാൽ വീണ്ടും അത്തരം ശ്രേഷ്ഠമായ മാസ്റ്റർപീസുകൾ ഉണ്ടായതേയില്ല.

നാഗർകോട്ട് 

മധ്യ നേപ്പാളിലെ കാഠ്മണ്ഡു താഴ്‌വരയുടെ അരികിലുള്ള ഒരു ഗ്രാമമാണ് നാഗർകോട്ട്.  വടക്കുകിഴക്ക് എവറസ്റ്റ് ഉൾപ്പെടെയുള്ള ഹിമാലയത്തിൻ്റെ കാഴ്ചകൾക്ക് ഇത് അറിയപ്പെടുന്നു, ഇത് സൂര്യോദയത്തിലും സൂര്യാസ്തമയത്തിലും പ്രത്യേകിച്ചും ശ്രദ്ധേയമാണ്.  ചുറ്റുപാടുമുള്ള സ്‌ക്രബ്‌ലാൻഡ് പാതകളാൽ ചുറ്റപ്പെട്ടിരിക്കുന്നു, കൂടാതെ നിരവധി ചിത്രശലഭങ്ങളുടെ ആവാസ കേന്ദ്രവുമാണ്.  പടിഞ്ഞാറ് ഭാഗത്തായി വിഷ്ണുവിന് സമർപ്പിച്ചിരിക്കുന്ന പുരാതന പഗോഡ ശൈലിയിലുള്ള ചംഗുനാരായണ ക്ഷേത്രവും ഹിന്ദു തീർത്ഥാടന കേന്ദ്രവുമാണ്.

ഇങ്ങനെ നേപ്പാളിൻ്റെ തലസ്ഥാനമായ കാഠ്മണ്ഡുവിലെ കാഴ്ചകൾ മാത്രമാണ് ഈ ലേഖനത്തിൽ പറഞ്ഞു വെച്ചിരിക്കുന്നത്. നേപ്പാൾ എന്ന രാജ്യത്ത് മനോഹരമായ മറ്റു സ്ഥലങ്ങളും ഉണ്ട്. 

സിം കാർഡ് 

ഇന്ത്യൻ സിം കാർഡ് അതിർത്തി കടക്കുമ്പോൾ തന്നെ നിശ്ചലമാകും. അല്ലെങ്കിൽ പോകും മുമ്പ് ഇന്റർനാഷണൽ റോമിങ്ങ് ഉപയോഗിക്കുന്നതിലേക്കായി റീചാർജ് ചെയ്യേണ്ടതായി വരും. അതിന് ഉയർന്ന നിരക്കുമാണ്. അതിനേക്കാൾ സൗകര്യം അതിർത്തിയിൽ തന്നെ അല്ലെങ്കിൽ വിമാനത്താവളത്തിൽ നിന്ന് ആധാർ കാർഡ് അല്ലെങ്കിൽ പാസ്പോർട്ട് എന്നിവ നൽകി Ncell എന്ന കമ്പനിയുടെ സിം കാർഡ് എടുക്കാവുന്നതാണ്. 350 ഇന്ത്യൻ രൂപ നൽകിയാൽ 5 ദിവസത്തേക്ക് 5 ജി.ബി ഡാറ്റയും Ncell ലേക്ക് സൗജന്യമായും വിളിക്കാവുന്നതാണ്.

താമസം

നേപ്പാളിൻ്റെ ഹൃദയ ഭാഗമെന്നറിയപ്പെടുന്ന തമേലിൽ ഒരുപാട് ഹോട്ടലുകളുണ്ട്. 1200 നേപ്പാളി രൂപ മുതൽ മുകളിലോട്ട് ഡബിൾ റൂം ലഭിക്കും. പക്ഷെ ഭക്ഷണം കഴിക്കാനുള്ള ഹോട്ടൽ മുഴുവനും മുന്തിയ വിലയിൽ ഭക്ഷണം വിളമ്പുന്നവയാണ്. കുറച്ചുള്ളിലോട്ട് പോയാൽ ബനിയാത്തർ എന്ന സ്ഥലത്ത് ഹോട്ടൽ സാറാസ് ബാക്ക്പാക്കേർസ് (Hotel Sara's Backpackers (P) Ltd.)** എന്നൊരു ചെറിയൊരു ഹോട്ടലുണ്ട്. അവിടെ 350 നേപ്പാളി രൂപയ്ക്ക് ഡോർമെറ്ററി സൗകര്യവും 800 നേപ്പാളി രൂപയ്ക്ക് സിംഗിൾ റൂമും 1200 നേപ്പാളി രൂപയ്ക്ക് ഡബിൾ റൂമും ലഭിക്കും. അതിന്റെ പരിസരങ്ങളിലായി നിരവധി ചെറിയ ചെറിയ ഹോട്ടലുകൾ ഉണ്ട്. പൊതുവേ ഇവിടങ്ങളിൽ ഭക്ഷണത്തിന് പൈസയും കുറവാണ്.

ഇൻ ഡ്രൈവ് (InDrive)

ഇൻ ഡ്രൈവ് (InDrive) എന്നൊരു ആപ്പ് ഡൗൺലോഡ് ചെയ്‌താൽ ബൈക്ക് ടാക്സിയോ, കാറോ ബുക്ക് ചെയ്യാവുന്നതാണ്. ഇഷ്ടം പോലെ ബസ്സുകളും ഷെയർ ടാക്‌സികളും ലഭ്യമാണ്.

എവിടെ പോയാലും കാശ് കൊടുക്കുമ്പോൾ നേപ്പാളി രൂപയാണോ ഇന്ത്യൻ രൂപയാണോ എന്ന് ചോദിച്ചു ഉറപ്പുവരുത്തുക. കാരണം മിക്ക സ്ഥലങ്ങളിലും ഈ രണ്ടു പൈസയും എടുക്കും. പ്രത്യേകിച്ച് ടൂറിസ്റ്റ് സ്ഥലങ്ങളിലും ടാക്സികളിലും. ഇന്ത്യയുടെ ഒരു രൂപ 1.6 നേപ്പാളി രൂപയാണ്***. മറ്റൊരു കാര്യം ഇന്ത്യയിൽ നിന്ന് നേരിട്ട് പൈസ അയക്കാൻ സാങ്കേതികമായ ബുദ്ധിമുട്ടുള്ളതിനാലും ഇന്ത്യൻ ബാങ്കിൻറെ എ.ടി.എം എല്ലാ സ്ഥലങ്ങളിലും എടുക്കണമെന്ന് നിർബന്ധവുമില്ല. എടുത്താൽ തന്നെ ഭീമമായ തുകയാണ് പൈസ പിൻവലിക്കുമ്പോൾ ഈടാക്കുന്നത്. പരമാവധി കയ്യിൽ ഇന്ത്യൻ രൂപ കരുതിയാൽ നേപ്പാളിൽ എവിടെ നിന്ന് വേണമെങ്കിലും നേപ്പാളി രൂപയായി മാറാവുന്നതാണ്. അല്ലെങ്കിൽ നേപ്പാളി രൂപയ്ക്ക് സമാനമായ തുക ഇന്ത്യൻ രൂപയായി നൽകാവുന്നതാണ്.

ട്രെയിൻ വഴി സാധാരണ സ്ലീപ്പർ കോച്ചിൽ യാത്ര ചെയ്തു പോകുന്നവർക്ക് പോകാനും വരാനും നേപ്പാളിൽ 5 ദിവസം ചിലവഴിക്കാനും ഏകദേശം 12000 ഇന്ത്യൻ രൂപ മതിയാകും.

©മോഹൻദാസ് വയലാംകുഴി

* (According to the 2023 Passport Index by Henley & Partners, Indian passport holders can now travel to 57 countries without facing visa issues. This list includes countries offering visa-free travel, visa-on-arrival services, and electronic travel authorization.)

** Hotel Sara's Backpackers (P) Ltd. - +9779851207616, +9779849046752 (WhatsApp & Call Available)

*** INR to NPR Convertor

Location Reference: Wikipedia

#nepal #kathmandu #tourist #yoddha #rimbochi #lama #everest #himalaya #visafree #MohandasVayalamkuzhy #Buddha #DalaiLama #Mohanlal #jagathysreekumar #madhoo #urvashi #India #IndoNepal #Raxaul #Lumbini #Hindu 

Auroville : The Future of World in India

 

രാവിലെ 7.30 ന് ക്യാബ് ഡ്രൈവർ വരുമ്പോഴേക്കും ഞാൻ പുറപ്പെടാൻ തയ്യാറായി നിൽക്കുകയായിരുന്നു. പോണ്ടിച്ചേയിൽ നിന്ന് 12 കിലോമീറ്റർ അകലെയാണ് Auro വില്ല.

Auroville : The Future of World in India, Pondicherry എന്ന തലക്കെട്ടോടെ ലോക ജനതയ്ക്ക് മുമ്പിൽ സമർപ്പിച്ച ഒരത്ഭുതം എന്ന് വേണമെങ്കിൽ പറയാം.

8 മണിക്ക് ഓറോ വില്ലയിലെ വിസിറ്റിംഗ് സെന്ററിൽ എത്തിയപ്പോൾ എഞ്ചിനിയർ ഗോവിന്ദ് സാർ എന്നെ സ്വീകരിച്ചു അവിടെയുള്ള ഫ്രഞ്ച് കഫ്റ്റരിയയിലേക്ക് കൊണ്ടു പോയി. ഞാൻ ഇടലിയും ചായയും കഴിച്ചിരിക്കുമ്പോൾ ഗോവിന്ദ് സാറിന്റെ അസിസ്റ്റന്റ് രാജേന്ദ്രൻ സാർ വന്ന് എന്നെ മാത്രി മന്ദിരത്തിലേക്ക് പോകാനുള്ള starting point ലേക്ക് കൊണ്ടുപോയി. പത്തിരുപത്തഞ്ചു പേർ ക്യൂ നിൽക്കുന്നുണ്ട്. ഞാനും പോയി ക്യൂവിൽ നിന്നപ്പോൾ എന്നെ അവിടത്തെ ചീഫ് വന്ന് കൂട്ടിക്കൊണ്ടുപോയി. സ്‌പെഷ്യൽ പാസ്സാണെന്നു അറിയാം. പക്ഷെ എം.എൽ.എ ലക്ഷ്മി നാരായണൻ സാർ പോണ്ടിച്ചേരി മുഖ്യമന്ത്രിയുടെ സ്‌പെഷ്യൽ പെർമിഷനോടെ അനുവദിച്ച പാസ്സായിരുന്നു എന്ന് പിന്നീടാണ് അറിഞ്ഞത്. ഫ്രഞ്ച് കോൺസുലേറ്റിൽ നിന്നും 12 പേരും ഉണ്ടായിരുന്നു.

ടെമ്പോ ട്രാവലർ മാത്രി മന്ദിരത്തിലേക്ക് വിട്ടു. കൃത്യം 9 മണിക്ക് മന്ദിരത്തിന് പുറത്തുള്ള ആലിനടിയിലേക്ക് കടത്തി വിട്ടു. അരമണിക്കൂറോളം അവിടെ ചിലവഴിച്ചു. മൊബൈൽ ഫോൺ, ബാഗ്,ക്യാമറ, ഒന്നും തന്നെ അകത്തേക്ക് അനുവദിക്കാത്തത് കൊണ്ട് ആദ്യമൊരു സങ്കടമുണ്ടായെങ്കിലും അകത്ത് പ്രവേശിച്ചപ്പോൾ മനസ്സിലായി ഒന്നും ഇല്ലാതെ സ്വർഗ്ഗത്തിൽ പ്രവേശിച്ചത് പോലൊരു തോന്നൽ. തത്തയും മൈനയും ചേക്കേറിയ ആ ആൽ ആദ്യം കണ്ടപ്പോൾ വലിയൊരു ആലും ചുറ്റും കുഞ്ഞു ആലുകളും എന്നാണ് കരുതിയത്. ചിന്തിച്ചു കൂട്ടിയതൊക്കെയും ആസ്ഥാനത്താക്കി ഞെട്ടിപ്പിച്ചു കൊണ്ട് ആൽ പന്തലിച്ചു കണ്ണിന് മുന്നിൽ ആദ്‌ഭുതമായി നിൽക്കുന്നു. ശിഖരങ്ങൾ വളർന്ന് താഴേക്കിറങ്ങി ഭൂമിയിൽ വേര് പിടിച്ചതാണോ അതോ മുകളിലിലേക്ക് വളർന്ന ആൽമരങ്ങൾ തമ്മിൽ ഒട്ടിപിടിച്ചതോ...!!

പിന്നീട് ഞങ്ങളെ അവർ മാത്രി മന്ദിരത്തിലേക്ക് കൊണ്ടുപോയി. ചുവന്ന ടൈൽ പാകിയ. വൃത്തിയുള്ള നിലങ്ങൾ. ഷൂസും സോക്‌സും അഴിച്ചു ഗ്ലോബിന്റെ ഒന്നാം നിലയിൽ പ്രവേശിച്ചപ്പോൾ അവിടെ പ്രത്യേകം തയ്യാറാക്കി വെച്ച വെള്ള സോക്സുകൾ ധരിക്കാൻ പറഞ്ഞു. റാമ്പിലൂടെ 3 തവണ കറങ്ങിയപ്പോൾ ഒരു വാതിൽ തുറന്നു തന്നു. വൃത്താകൃതിയിൽ ഉള്ള വലിയ ഹാൾ വെളുത്ത 12 മാർബിൾ തൂണുകൾ ചുമരും തറയും വെളുത്ത മാർബിൾ തന്നെയാണ്. ഹാളിന്റെ ഒത്ത നടുവിൽ ഒരു സ്പടികത്തിൽ നിർമ്മിച്ച ഗ്ലോബ്, അതിലേക്ക് നേരിട്ട് ആർട്ടിഫിഷ്യൽ സൂര്യപ്രകാശം പതിക്കുന്നുണ്ടായിരുന്നു. ഹാളിൽ മറ്റു വെളിച്ചമോ സ്വിച്ച്, പ്ലഗ്ഗ്‌, ലൈറ്റ്, ജനൽ, വായു സഞ്ചാരത്തിനുള്ള മാർഗ്ഗങ്ങളൊന്നും തന്നെ ഉണ്ടായിരുന്നില്ല. എന്നിട്ടും തണുപ്പു നിറഞ്ഞതായിരുന്നു ആ ഹാൾ. ധ്യാനിക്കാൻ വേണ്ടി പ്രത്യേകം ഒരുക്കിയ കുഷ്യനുകളിൽ എല്ലാവരും ഇരുന്നു. ചുമയ്ക്കുകയോ തുമ്മുകയോ ചെയ്യരുത്. അങ്ങനെ തോന്നിയാൽ പുറത്തു പോകണം. കനത്ത നിശബ്ദത നിറഞ്ഞ ഒരു മണിക്കൂർ കടന്നു പോയത് പോലും അറിഞ്ഞില്ല. തിരികെ താഴെയിറങ്ങി മറ്റൊരു വഴിയിലൂടെ ഗ്ലോബിന്റെ കീഴെയുള്ള പ്രത്യേകം തയ്യാറാക്കിയ മാർബിളിൽ ജലധാരയ്ക്ക് ചുറ്റും ധ്യാനനിരതനായി ഇരുന്നു. പിന്നെ പതുക്കെ പുറത്തേക്ക്.

ഇനി ഓറോ വില്ലയെക്കുറിച്ചൊരു വിവരണവും കൂടി.

തമിഴ്നാട്ടിലെ വില്ലുപുരം ജില്ലയിൽ സ്ഥിതിച്ചെയ്യുന്ന ഒരു ആഗോള നഗരമാണ് ഓറോവില്ല. നിരവധി രാജ്യങ്ങളിൽ നിന്നുള്ളവർ ഇവിടെ ഒത്തൊരുമിച്ച് കഴിയുന്നു. ജാതി, മത, വർണ്ണ ഭേദമില്ലാത്ത ഇടമാണ് ഓറോവില്ല. പോണ്ടിച്ചേരിയിൽനിന്ന് കേവലം 12 കിലോമീറ്റർ വടക്കാണ് ഓറോവില്ലിന്റെ സ്ഥാനം. 1968ൽ മിറാ അൽഫാസ്സയാണ് ഈ നഗരം സ്ഥാപിച്ചത്. റോജർ ഏങ്കറാണ് ഈ നഗരത്തിന്റെ വാസ്തുശില്പി. ലോകത്തിന് മാനവ ഐക്യത്തെ കാട്ടിക്കൊടുക്കുക എന്നതാണ് ഓറോവില്ല എന്ന സംരംഭത്തിന്റെ ഉദ്ദേശം.

അരൊബിന്ദോ സൊസൈറ്റിയുടെ ഭാഗമായി 1968 ഫെബ്രുവരി 28, ബുധനാഴ്ച മിറാ അല്ഫാസയാണ് ഓറോവില്ല സ്ഥാപിച്ചത്. അരൊബിന്ദോയുടെ സഹകാരിയായിരുന്നു അമ്മ എന്നറിയപ്പെടുന്ന മിറാ അല്ഫാസ. ഓറോവിൽ നഗരത്തിന്റെ ഉദ്ഘാടന വേളയിൽ 124 രാജ്യങ്ങളിൽനിന്നുള്ള പ്രതിനിധികൾ പങ്കെടുത്തിരുന്നു. അന്നേ ദിവസം അമ്മ(മിറാ അല്ഫാസ) ഓറോവില്ലിനെ സംബന്ധിക്കുന്ന നാലുകാര്യങ്ങൾ പറയുകയുണ്ടായി.

ഓറോവില്ല ആരുടെയെങ്കിലും സ്വകാര്യ സ്വത്തല്ല. ലോകത്തിലെ സർവമനുഷ്യർക്കും ഓറോവില്ല ഒരുപോലെ അവകാശപ്പെട്ടതാണ്. ലോക മാനവികതയ്ക്ക് സമർപ്പിക്കപ്പെട്ട നഗരമാണ് ഓറോവില്ല. പക്ഷെ ലോകമാനവർക്കുവേണ്ടി സേവനം ചെയ്യാൻ തല്പരരായിരിക്കുന്നവർക്കേ ഓറോവില്ലിൽ താമസിക്കാൻ കഴിയൂ.

ശാശ്വതമായ വിജ്ഞാനത്തിന്റെയും, സ്ഥായിയായ പുരോഗതിയുടെയും, സനാതന യൗവനത്തിന്റെയും കേന്ദ്രമായിരിക്കും ഓറോവില്ല. ഭൂതകാലത്തിനും ഭാവിക്കും ഇടയിലുള്ള പാലമായി ഓറോവില്ല വർത്തിക്കും.

മാനവികതയെ സംബന്ധിച്ച ഭൗതികവും ആധ്യാത്മികവുമായ ഗവേഷണങ്ങളുടെ ഭൂമിയായിരിക്കും ഓറോവില്ല.

ഓറോവില്ലിലെ വാസ്തുവിസ്മയമാണ് മാത്രിമന്ദിർ. യോഗ, ആത്മീയധ്യാനം എന്നിവയ്ക്കായുള്ള ക്ഷേത്രമാണ് ഇത്. മിറ അൽഫാസ്സിന്റെ സങ്കല്പത്തിൽ "പരിപൂർണ്ണതയ്ക്കുവേണ്ടിയുള്ള മാനവരുടെ പ്രേരണക്ക് നൽകാവുന്ന ദൈവികമായ ഉത്തരമാണ് മാത്രിമന്ദിർ".

പുറംകാഴ്ചയിൽ സുവർണ്ണനിറത്തിലുള്ള ഒരു ഗോളാമാണ് ഈ നിർമ്മിതി. സന്ദർശകർക്ക് മനഃശാന്തി കൈവരിക്കുന്നതിനായി മാത്രിമന്ദിറിനകം എപ്പോഴും നിശ്ശബ്ദമായിരിക്കത്തക്ക വിധം സംരക്ഷിച്ചിരിക്കുന്നു.

എല്ലാ സൗകര്യങ്ങളും ഒരുക്കി തന്ന എന്റെ പ്രീയ സുഹൃത്ത് മോഹൻദാസിന്, അവരുടെ മാനേജർ വിജയ്, എല്ലാവരെയും സ്നേഹപൂർവ്വം ഓർക്കുന്നു.

NB : ഓറോ വില്ലായിലേക്ക് ആർക്ക് എപ്പോൾ വേണമെങ്കിലും പോകാം. ഗ്ലോബിന് (മാത്രി മന്ദിരം) ചുറ്റും പുറത്തു നിന്ന് നോക്കി കാണാം. മാത്രി മന്ദിരത്തിനുള്ളിൽ കയറണമെങ്കിൽ മാത്രമാണ് പാസ്സ് ആവശ്യമുള്ളത്.

© മോഹൻദാസ് വയലാംകുഴി

#auroville #pondicherry #puducherry #Sriaurobindo #matrimandir #globalvillage #aurovilleglobal #MohandasVayalamkuzhy

Interview Tips & Personal Grooming

Personal Grooming - 1

പലരും കുറെയധികം ഇന്റർവ്യൂ അറ്റൻഡ് ചെയ്യാൻ പോകും. റിസൾട്ട് വരുമ്പോൾ റാങ്ക് ലിസ്റ്റിൽ പോലും ഉണ്ടാകില്ല. എന്താണ് നിങ്ങളുടെ പ്രശ്‌നമെന്ന് എപ്പോഴെങ്കിലും സെൽഫ് അനാലിസിസ് നടത്തിയിട്ടുണ്ടോ? ഇല്ലെങ്കിൽ നിങ്ങൾ ആദ്യം ചെയ്യേണ്ടത് ഒരു കടലാസെടുത്തു നിങ്ങളുടെ സ്ട്രെങ്ങ്ത്തും വീക്ക്നെസും ഒന്ന് എഴുതി നോക്കുക. എന്നിട്ട് വീക്ക്നെസ് ഉള്ള ഭാഗങ്ങൾ ഒന്ന് കറക്റ്റ് ചെയ്യാൻ ശ്രമിക്കുക. അല്ലാതെ എന്നെക്കാളും യോഗ്യതയില്ലാത്തവർക്കാണ് ആ ജോലി കിട്ടിയിരിക്കുന്നത് എന്നൊക്കെ നിലവിളിച്ചു സ്വയം ന്യായീകരിക്കാൻ ശ്രമിച്ചാൽ വലിയ മണ്ടത്തരമായിരിക്കും.

യോഗ്യത:

വിളിച്ച ജോലിക്കുള്ള കൃത്യമായ യോഗ്യത നിങ്ങൾക്കുണ്ടോ എന്നു പരിശോധന നടത്തി മാത്രം ഇന്റർവ്യൂ അറ്റൻഡ് ചെയ്യുക. അല്ലെങ്കിൽ അപേക്ഷിക്കുന്നതിന് മുമ്പായി ഏതെങ്കിലും ബിരുദം അല്ലെങ്കിൽ ഏതെങ്കിലും ബിരുദാനന്തര ബിരുദം എന്ന് പരസ്യത്തിൽ കണ്ടാലും ജോലി എന്താണെന്ന് നോക്കിയ ശേഷം അതിന് സ്വയം യോഗ്യതയുണ്ടോ എന്നു മാത്രം പരിശോധിക്കുക. പരിശോധിച്ചു ഉറപ്പുവരുത്തി മാത്രം അപേക്ഷിക്കുക. മിക്ക ഓഫീസുകളിലും കമ്പ്യൂട്ടർ ഉപയോഗിക്കുന്നുണ്ട്. മാത്രമല്ല ഓഫീസ് കാര്യങ്ങൾ മുഴുവനും കമ്പ്യൂട്ടർ വഴി മാത്രം നടത്തുകയും ചെയ്യുന്നുണ്ട്. അതുകൊണ്ട് തന്നെ വേഡ്, എക്സൽ, പവർ പോയിന്റ്, ടൈപ്പിംഗ് സ്പീഡ്, ഈമെയിൽ, എന്നിവയെക്കുറിച്ചൊക്കെ നല്ല അറിവ് ഉണ്ടായിരിക്കേണ്ടത് അത്യാവശ്യമാണ്. അതുകൊണ്ടുതന്നെ അത്തരത്തിലുള്ള അഡീഷണൽ കോഴ്‌സുകൾ നിർബന്ധമായും പഠിച്ചു വയ്ക്കുക. കൂടാതെ ഇംഗ്ലീഷ് ഭാഷ നന്നായി കൈകാര്യം ചെയ്യാൻ നിർബന്ധമായും അറിഞ്ഞിരിക്കേണ്ടത് മുന്നോട്ടുള്ള വളർച്ചയ്ക്കും അത്യാവശ്യമാണ്. കൂടുതൽ ഭാഷകളിൽ പ്രാവീണ്യമുണ്ടെങ്കിൽ ജോലിയിലുള്ള ഉയർച്ചയും അതുമൂലം ഉന്നത പദവിയിലെത്താനുള്ള സാധ്യതയും കൂടുതലാണ്.

ബയോഡാറ്റ:

ബയോഡാറ്റ പരമാവധി സ്വന്തമായി തയ്യാറാക്കുക. തയ്യാറാക്കുമ്പോൾ കൃത്യമായി ബോധ്യമുള്ള വിവരങ്ങൾ മാത്രം ഉൾപ്പെടുത്താൻ ശ്രദ്ധിക്കുക. ഉദാഹരണത്തിന് ഭാഷ തമിഴ്, ഇംഗ്ലീഷ് എന്നൊക്കെ കൊടുക്കും. തമിഴ് സിനിമ കണ്ടതിന്റെ ബലത്തിൽ ആയിരിക്കും. എന്നിട്ട് ആരെങ്കിലും തമിഴിൽ എന്തെങ്കിലും ചോദിച്ചാൽ ബ...ബ...ബ... അടിക്കും. പിന്നെ ഹോബിസ് എന്നും പറഞ്ഞു ട്രാവലിംഗ്, റീഡിങ്ങ് എന്നൊക്കെ കാച്ചിക്കളയും. ലാസ്റ്റ് വായിച്ച പുസ്തകം ഏതാണെന്ന് പോലും ഓർമ്മ കാണില്ല, അത് എഴുതിയത് ആര്, അദ്ദേഹത്തിന്റെ ഏറ്റവും പുതിയ പുസ്തകമേത് എന്ന് ചോദിച്ചാൽ വിയർക്കും. അവസാനം എവിടേക്കാണ് ട്രാവൽ ചെയ്തതെന്ന് ചോദിച്ചാൽ ജീവിതത്തിൽ ഇന്നേവരെ ജില്ല വിട്ടു പോയിട്ടുണ്ടാവില്ല. ആഗ്രഹമാണ് എന്നൊക്കെ പറയും. ഹോബിസ് എന്നത് ആഗ്രഹമല്ല എന്ന് ആദ്യം മനസ്സിലാക്കുക. പിന്നെ എക്സ്പീരിയൻസ് വയ്ക്കുമ്പോൾ ചെയ്ത ജോലിയുടെ മാത്രം വയ്ക്കുക. ചെയ്യാത്ത ജോലിയെക്കുറിച്ചു ചോദിച്ചാൽ തീരും നിങ്ങളുടെ മുന്നിലുള്ള ഭാവിയിൽ ലഭിച്ചേക്കാവുന്ന ജോലി. പിന്നെ ഏത് ഇന്റർവ്യൂവിന് പോകുമ്പോഴും അപ്‌ഡേറ്റ് ചെയ്ത ബയോഡാറ്റ തന്നെ എടുക്കാൻ പ്രത്യേകം ശ്രദ്ധിക്കണം.

ഇന്റർവ്യൂ:

ബയോഡാറ്റയിൽ പറഞ്ഞിരിക്കുന്ന എല്ലാ കാര്യങ്ങളെക്കുറിച്ചും കൃത്യമായ ബോധ്യത്തോടൊപ്പം തന്നെ പഠിച്ച വിഷയത്തെക്കുറിച്ചും അറ്റൻഡ് ചെയ്യുന്ന ജോലിയുടെ സ്വഭാവത്തെക്കുറിച്ചും നന്നായി ഹോംവർക്ക് ചെയ്തു പോവുക. അനുഭവ സമ്പത്തും ഒപ്പം അക്കാദമിക്ക് മികവും കൂടിയുള്ള ഒരു വ്യക്തിയാണ് ഇന്റർവ്യൂ ബോഡിൽ ഇരിക്കുന്നതെങ്കിൽ നിങ്ങൾ നല്ലരീതിയിൽ ജാഗ്രത പുലർത്തേണ്ടിയിരിക്കുന്നു.

ഇന്റർവ്യൂ അറ്റൻഡ് ചെയ്യുന്ന പുരുഷൻമാർ ശ്രദ്ധിക്കേണ്ടത്:

ശരീരത്തിന് ഇണങ്ങിയ, ഫിറ്റായ ലൈറ്റ് കളർ ഷർട്ട് തിരഞ്ഞെടുക്കുക. അതും ഫോർമൽ ഷർട്ട്. ഒപ്പം ഫോർമൽ പാന്റ് തന്നെ ധരിക്കാൻ ശ്രദ്ധിക്കണം (പലരും ജീൻസ് ധരിച്ചു ഇന്റർവ്യൂ അറ്റൻഡ് ചെയ്യുന്നുണ്ട്). ഫോർമൽ ഷൂസ് തന്നെ തിരഞ്ഞെടുക്കുക, ഒപ്പം നന്നായി പോളീഷ് ചെയ്തു ഉപയോഗിക്കുക. കയ്യിലും കഴുത്തിലും അനാവശ്യ നൂലുകളും മലകളും വളകളും ഒഴിവാക്കുന്നത് നല്ലതായിരിക്കും. അഥവാ അങ്ങനെയുണ്ടെങ്കിൽ അധികം പുറത്ത് കാണാത്ത രീതിയിൽ മറച്ചു വയ്ക്കുക. മുടി ഭംഗിയായി വെട്ടിയൊതുക്കി വയ്ക്കുക. കൈ വിരലിലെ നഖങ്ങളും വൃത്തിയായി വെട്ടി വയ്ക്കുക. മറ്റുള്ളവർക്ക് ആരോചകമാവാത്ത പെർഫ്യൂം ഉപയോഗിക്കുക.

ഇന്റർവ്യൂ അറ്റൻഡ് ചെയ്യുന്ന സ്ത്രീകൾ ശ്രദ്ധിക്കേണ്ടത്:

ശരീരത്തിന് ഇണങ്ങിയ, ഫിറ്റായ ഫോർമൽ വസ്ത്രങ്ങൾ, അല്ലെങ്കിൽ സാരിയോ ചൂരിദാറോ ധരിക്കുക. എന്ത് ധരിക്കുമ്പോഴും ശരീരത്തിന് ഇണങ്ങിയതാണോ, എന്തെങ്കിലും അസ്വസ്ഥതകൾ ഉണ്ടാക്കുന്നവയാണോ എന്നൊക്കെ പരിശോധിക്കുക. ഉദാഹരണത്തിന് ചുരിദാർ ധരിക്കുമ്പോൾ ഷോൾ ഇടുന്നവർ അത് ഇടയ്ക്കിടെ നേരെയാക്കിക്കൊണ്ടിരിക്കുക, മുടി മുഖത്ത് പാറി വരുമ്പോൾ അത് ഇടയ്ക്കിടെ പിന്നോട്ട് ശരിയാക്കാൻ ശ്രമിക്കുക, സാരി ഉടുത്തു പോയാൽ അരക്കെട്ട് കാണുന്നുണ്ടോ, മുൻഭാഗം ശരിയായി ഒതുക്കത്തിൽ നിൽക്കുന്നുണ്ടോ എന്നൊക്കെ ഇടയ്ക്കിടെ ശ്രദ്ധിക്കുമ്പോൾ ഇന്റർവ്യൂ ചെയ്യുന്ന വ്യക്തിക്ക് അസ്വസ്ഥത തോന്നിയേക്കാം. ലൈറ്റ് ഷേഡ് ലിപ്സ്റ്റിക്കും അത്യാവശ്യം മേക്കപ്പ് മാത്രം ചെയ്യുക. അതുപോലെതന്നെ വസ്ത്രത്തിന് ഇണങ്ങും വിധമുള്ള ആഭരണങ്ങൾ മാത്രം ധരിക്കുക. നെയിൽ പോളീഷ് ചെയ്യുന്നവർ വൃത്തിയായി ചെയ്യുക. അവിടെയും ഇവിടെയും അടർന്നു പോയ നഖങ്ങൾ കാണുമ്പോൾ ആരോചകം സൃഷ്ടിച്ചേക്കാം. കാലിന് ഇണങ്ങുന്ന ചപ്പലോ ഷൂസോ ധരിക്കുക. ഇട്ടിരിക്കുന്ന വസ്ത്രത്തിനും മാച്ചുണ്ടായാൽ നല്ലത്.

പൊതുവായി ശ്രദ്ധിക്കേണ്ട കാര്യങ്ങൾ:

ഇന്റർവ്യൂന് പോകുമ്പോൾ ആവശ്യമായ എല്ലാ ഒറിജിനൽ രേഖകളും എടുക്കുന്നതിനോടൊപ്പം എല്ലാറ്റിന്റെയും ഫോട്ടോ കോപ്പിയും കരുതുക. ഒപ്പം പാസ്സ്പോർട്ട് സൈസ് ഫോട്ടോസ്, ഒറിജിനൽ ഐഡൻറിറ്റി കാർഡ്, പാൻ കാർഡ്, ബാങ്ക് പാസ് ബുക്ക് എന്നിവയും അവയുടെ ഫോട്ടോ കോപ്പിയും കരുതുക. എല്ലാറ്റിന്റെയും ഓരോ കോപ്പി ഓർഡറിൽ പിൻ ചെയ്തു വയ്ക്കുക. കയ്യിൽ കറുപ്പും നീലയും മഷിയുള്ള ഒന്നിലധികം പേനകൾ കരുതുക. എല്ലാ സർട്ടിഫിക്കറ്റുകളും കൃത്യമായി കാണിക്കാൻ പറ്റിയ ഒതുക്കമുള്ള ഒരു ഫയലിൽ ഓർഡറിൽ തല കീഴാകാതെ ഒരേ ഭാഗത്ത്‌ കാണാത്തക്ക രീതിയിൽ വയ്ക്കുക. ഇത്തരം ഫയലിൽ അനാവശ്യ സർട്ടിഫിക്കറ്റുകളും കടലാസുകളും ഒഴിവാക്കുക.

ഇനിയാണ് വളരെയധികം ശ്രദ്ധിക്കേണ്ട കാര്യങ്ങൾ. നിങ്ങൾ പല സമൂഹ മാധ്യമങ്ങൾ ഉപയോഗിക്കുന്നവരായിരിക്കാം. പല തരത്തിലുള്ള പോസ്റ്റുകൾ സ്വന്തമായി എഴുതിയിടുന്നവരോ, അതുമല്ലെങ്കിൽ മറ്റുള്ളവരുടെ പോസ്റ്റുകൾ ഷെയർ ചെയ്യുന്നവരാകാം. എന്തുതന്നെയായാലും അത് നിങ്ങളെ ഏത് തരത്തിൽ ആളുകൾ വിളിയിരുത്തുന്നുണ്ടെന്നോ, അതിലെ അപകടം എന്താണെന്നോ നിങ്ങൾ ചിന്തിച്ചു കാണുമോ എന്നറിയില്ല. കോളിളക്കം സൃഷ്ടിച്ച ഒരു ബലാത്സംഗ കൊലപാതക കേസിലെ പ്രതിയെ തൂക്കിക്കൊല്ലണമെന്നും, അവനെ നേരിൽ കണ്ടാൽ തല്ലി കൊല്ലണമെന്നൊക്കെയുള്ള പോസ്റ്റുകൾ കയ്യടി നേടിയേക്കാം. പക്ഷെ, അത്രത്തോളം അഗ്രസീവും നിയമത്തെക്കുറിച്ചുള്ള ബോധമില്ലാത്തവരും, നിയമത്തെ പേടിയില്ലാത്തവരും ഭരണകൂടത്തെയും ജുഡീഷ്യൽ വ്യവസ്ഥകളോട് പുച്ഛമുള്ളവരുമായിരിക്കും ഇത്തരം ആളുകൾ. ആ പോസ്റ്റ് ഷെയർ ചെയ്യുമ്പോൾ നമ്മുടെ ചിന്തയും അതിനോട് അനുകൂലിക്കുന്നു എന്നതാണ് നാം മനസ്സിലാക്കേണ്ടത്. പ്രത്യക്ഷമായ സ്വഭാവവും പരോക്ഷമായ സ്വഭാവവും രണ്ടും രണ്ടായിരിക്കും. അതുകൊണ്ടു തന്നെ ഇത്തരത്തിലുള്ള ഒരാളെ ജോലിക്കെടുക്കാൻ ബന്ധപ്പെട്ടവർ ഒന്ന് മടിക്കും. ഇതേപോലെതന്നെയാണ് നമ്മുടെ മറ്റുള്ള സമൂഹ മാധ്യമ ഇടപെടലും സൂചിപ്പിക്കുന്നത്. തീവ്ര ജാതിമത, രാഷ്ട്രീയ ചിന്തകൾ നിങ്ങൾ സമൂഹ മാധ്യമങ്ങളിൽ പ്രകടിപ്പിക്കുമ്പോൾ നിങ്ങൾ ഇന്റർവ്യൂവിന് കടന്നു ചെല്ലുന്ന കമ്പനികളുടെ മേധാവികൾ നിങ്ങളുടെ ചിന്തകൾക്ക് എതിർ ചേരിയിൽ നിൽക്കുന്ന ജാതിമത രാഷ്ട്രീയ ചിന്തകളുമായി സഹകരിച്ചു പോകുന്നവരായിരിക്കാം, ഇതിനോടൊക്കെ വൈമുഖ്യം കാണിക്കുന്നവരുമായിരിക്കാം. അതുകൊണ്ടുതന്നെ നിങ്ങളുടെ ഇത്തരം തീവ്ര ചിന്തകളും നിങ്ങൾക്ക് പ്രതികൂലമായി ബാധിച്ചേക്കാം.

വാട്ട്സ് ആപ്പ് സ്റ്റാറ്റസ് ഇട്ടതിന്റെ പേരിൽ അടിച്ചു പിരിഞ്ഞ ദമ്പതികളും കാമുകീകാമുകന്മാരും സുഹൃത്തുക്കളുംവരെയുണ്ട്. ഇത്തരം ആശ്രദ്ധകളും, അറിവില്ലായ്മാകളൊക്കെ നമ്മുടെ സ്വര്യ ജീവിതത്തിനും ജോലിക്കും തടസ്സമായി വന്നേക്കാം.

സമൂഹ മാധ്യമങ്ങൾ കൈകാര്യം ചെയ്യുന്നതിലെ പിഴവ് മുതലാളിമാർക്കും, ഉയർന്ന പോസ്റ്റിൽ ഇരിക്കുന്നവർക്കും സ്ഥാപനങ്ങൾക്കും സ്ഥാനഭ്രംശവും സ്ഥാപനത്തിന്റെ സുഖമമായി മുന്നോട്ട് പോകുന്നതിനെ തടസ്സപ്പെടുത്തിയേക്കാം. സർക്കാർ തലത്തിലും ഭിന്നതകൾ സംഭവിച്ചേക്കാം. നിർദ്ധോഷമായി ഏതെങ്കിലും പോസ്റ്റുകളിൽ പോയി ഇടുന്ന കമന്റുകൾ പോലും എട്ടിന്റെ പണി കിട്ടിയേക്കാം. ലോകം നമുക്ക് മുന്നിൽ ഇരുപത്തിനാലു മണിക്കൂറും ഇമ ചിമ്മാതെ കിടക്കുന്ന CCTV ക്യാമറ പോലെയാണ്.

പഠിക്കുന്ന സമയത്ത് വിദ്യാർത്ഥി പ്രസ്ഥാനത്തിലും മറ്റും പ്രവർത്തിച്ചു പലതരത്തിലുള്ള കേസുകൾ ഉണ്ടാകാം. അത്തരത്തിലുള്ള കേസുകൾ ജോലിക്ക് കയറുന്ന സമയത്ത് പാരയായി വന്നേക്കാം. ഇങ്ങനെയുള്ള കേസുകൾ ഉണ്ടെങ്കിൽ പരമാവധി പഠിത്തം കഴിഞ്ഞിറങ്ങുമ്പോൾ തന്നെ സ്വന്തം ചെലവിൽ വക്കീലിനെയൊക്കെ വെച്ചു ഏറ്റവും വേഗത്തിൽ ഒഴിവാക്കി ഒന്നിൽ കൂടുതൽ കേസുകൾ പല സ്ഥലങ്ങളിൽ ഉണ്ടെങ്കിൽ ഹൈക്കോടതിയിൽ പോയി ക്വാഷ് ചെയ്തു ഉത്തരവ് കയ്യിൽ സൂക്ഷിക്കുക.

ജോലി ലഭിച്ചാൽ:

ജോലി ലഭിച്ചാൽ എന്തും ആകാം, പഴയ പോലെയൊക്കെ നടന്നുകളയാം എന്നൊന്നും വിചാരിക്കരുത്. ഓരോ കമ്പനിക്കും ഓരോ പോളിസിയും, നിയമങ്ങളും വ്യവസ്ഥകളും ഉണ്ട്. അതുകൊണ്ടുതന്നെ പ്രൊബേഷൻ പിരിഡിൽ ഇത്തരം കാര്യങ്ങളൊക്കെ കമ്പനികൾ കർശ്ശനമായി നിരീക്ഷിക്കും. പിന്നെ പെർഫോമൻസ്, ടൈം മാനേജ്‌മെന്റ്, ടാർഗറ്റ് അചീവ്മെന്റ്, തുടങ്ങി മറ്റു പല ഘടങ്ങളുടെയും അടിസ്ഥാനത്തിൽ വിലയിരുത്തിയായിരിക്കും നിങ്ങളെ ആ കമ്പനിയിൽ സ്ഥിരപ്പെടുത്തുന്നത്. മേൽ സൂചിപ്പിച്ചതൊക്കെ സർക്കാർ ജോലിക്കും ബാധകമാണ് (ഓഫർ ലെറ്റർ കൃത്യമായി വായിച്ചു നോക്കുക). ഒരു ജോലി പോയാൽ വേറെ നൂറുജോലി കിട്ടുമെന്നൊക്കെ വീമ്പിളക്കാമെങ്കിലും കരിയർ ബ്രെക്കും തുടർച്ചയായ മാറ്റം ഒരു ജോലിയിലും അധികം പിടിച്ചു നിൽക്കാത്ത വ്യക്തിയെന്ന ലേബൽ വരികയും പിന്നീട് ഉദ്ദേശിച്ച ജോലികളൊന്നും ലഭിക്കാതെ വരികയും ചെയ്യും. പല കമ്പനികളും മുൻപ് ജോലി ചെയ്ത കമ്പനിയിലെ സാലറി സ്‌ലിപ്പൊക്കെ നോക്കി ഉറപ്പു വരുത്തുന്ന പതിവും ഉണ്ട്. എക്സ്പീരിയൻസ് സർട്ടിഫിക്കറ്റ് നൽകിയാൽ ഇന്റേണൽ വെരിഫിക്കേഷനും നടത്താറുണ്ട്.

ഫിറ്റ്നസ്:

ഏത് ജോലി ലഭിച്ചാലും തട്ടിമുട്ടി പോകാമെന്നും ജോലി ലഭിച്ചു കഴിഞ്ഞാൽ പിന്നെ ഇഷ്ടമുള്ള രീതിയിൽ നടക്കാമെന്നൊക്കെയുള്ള ചിന്ത ആദ്യം ഒഴിവാക്കുക. എല്ലാ കമ്പനികളും ഒരാളുടെ ആരോഗ്യം, മെന്റൽ ഹെൽത്ത്, വർക്ക് എഫിഷ്യൻസി, ധരിക്കുന്ന വസ്ത്രം, വൃത്തി എല്ലാം ശ്രദ്ധിക്കും. ഇതൊക്കെയും കൃത്യമായി മെയിന്റൻ ചെയ്യാൻ സാധിക്കുന്നില്ല എന്നു കമ്പനിക്ക് തോന്നിയാൽ കമ്പനി ഏതെങ്കിലും തരത്തിൽ ഒഴിവാക്കും. ഒട്ടുമിക്ക കമ്പനികളും ആറുമാസത്തിലൊരിക്കൽ പെർഫോമൻസ് അപ്രൈസൽ, ട്രെയിനിംഗ്, എന്നൊക്കെയുള്ള പരിപാടികൾ കാര്യക്ഷമമായി തന്നെ നടത്താറുണ്ട്. അത്തരത്തിലുള്ള പരിപാടികളിൽ മോശം പെർഫോമൻസ് കാഴ്ച വയ്ക്കുന്നവരെയാണ് കമ്പനികൾ പല കാരണങ്ങൾ പറഞ്ഞു പിരിച്ചു വിടുന്നത്. പിരിച്ചുവിടലിന് കാരണമായി കമ്പനികൾ പലപ്പോഴും റിസഷൻ എന്നൊക്കെയാണ് പുറത്തുപറയുന്നത്. യഥാർത്ഥ കാരണങ്ങൾ ഇതൊക്കെത്തന്നെയാണ്. കാരണം, കൂട്ട പിരിച്ചുവിടൽ നടത്തിയ പല കമ്പനികളും നല്ല ഗ്രോത്ത് കാഴ്ചവയ്ക്കുകയും നല്ല ലാഭത്തിൽ തന്നെയാണ് മുന്നോട്ട് പോകുന്നതും.

എക്സ്പീരിയൻസ്:

ഒരു കമ്പനിയിൽ വളരെക്കാലം ജോലി ചെയ്യുകയും ആ ജോലിയിൽ വളരെനല്ല പെർഫോമൻസ് കാഴ്ചവയ്ക്കുകയും ചെയ്താൽ മറ്റു കമ്പനികൾ കൂടുതൽ ശമ്പളം ഓഫർ ചെയ്തു ഇന്റർവ്യൂ ഇല്ലാതെ തന്നെ എടുക്കുകയും ചെയ്യും. ഇത്തരത്തിൽ ഓഫർ ലഭിക്കുമ്പോഴും ഓഫർ ചെയ്ത കമ്പനിയെക്കുറിച്ചും ലഭിക്കുന്ന പദവിയെക്കുറിച്ചും ശമ്പളത്തെക്കുറിച്ചും കൃത്യമായ ധാരണയുണ്ടായിരിക്കണം. അല്ലെങ്കിൽ ഉത്തരത്തിലുള്ളത് എടുക്കാനും വയ്യ കക്ഷത്തിലുള്ളത് പോവുകയും ചെയ്തു എന്ന് പറഞ്ഞപോലൊരു അവസ്ഥയാകും. പിന്നീട് പഴയ പദവിയും പഴയ ശമ്പളവും ലഭിക്കാതെയും വരാം.

ടെർമിനേഷൻ:

ഒരു കമ്പനിയും ഒരാളെ പരമാവധി ടെർമിനേറ്റ് ചെയ്യാൻ നിൽക്കാറില്ല. അങ്ങനെ ചെയ്താൽ മറ്റൊരു കമ്പനിയിൽ ജോലിക്ക് ശ്രമിച്ചാൽ കിട്ടാതെ വരും. ഒരു കമ്പനിയിൽ ജോലിയിലിരിക്കെ മോശം പെരുമാറ്റമോ, കമ്പനിയുടെ പോളിസിയും, നിയമങ്ങളും വ്യവസ്ഥകളും പാലിക്കാതിരിക്കുകയും കമ്പനിയുടെ സൽപ്പേരിനെ ബാധിക്കുന്ന രീതിയിൽ പ്രവർത്തിക്കുകയും ചെയ്താൽ ടെർമിനേഷൻ എന്ന നടപടിയിലേക്ക് കമ്പനി പോകും. മൾട്ടിനാഷണൽ കമ്പനികളൊക്കെയാണെങ്കിൽ മറ്റു കമ്പനികളിലേക്ക് കൂടി ടെർമിനേഷൻ വിവരം അറിയിക്കുകയും, പിന്നീട് ആ കമ്പനികളിലൊന്നും തന്നെ ജോലി ലഭിക്കാതിരിക്കുകയും ചെയ്യും. സർക്കാർ ജോലികളിൽ നിന്നും ഇതുപോലെ നിർബന്ധിത പിരിച്ചുവിടൽ പ്രക്രീയ നടന്നു കഴിഞ്ഞാൽ പിന്നെ പ്രൈവറ്റ് കമ്പനികളിൽ കൂടി ജോലി സാധ്യത വിരളമായിരിക്കും.

കയ്യിലിരിപ്പ് നന്നായാൽ ടെൻഷനില്ലാതെ ജീവിക്കാം.

Personal Grooming - 2

Unlock your potential & find a job that sets your soul on fire

(https://storiesofmohandas.blogspot.com/2024/06/unlock-your-potential-and-find-job-that.html)

Personal Grooming - 3

Crafting The Perfect Resume: A Step-by-Step Guide to Stand Out

https://storiesofmohandas.blogspot.com/2024/09/crafting-perfect-resume-step-by-step.html

©മോഹൻദാസ് വയലാംകുഴി

ഫൗണ്ടർ, ബെറ്റർ ലൈഫ് ഫൗണ്ടേഷൻ ഇൻഡ്യ

Interview Published by:

Grihshobha Malayalam Magazine

https://malayalam.grihshobha.in/society/things-to-remember-while-attending-an-interview

#interviewtips #grihshobhamalayalam #grihshobha #delhipress #personalgrooming #grooming #interview #MohandasVayalamkuzhy

വിവാഹത്തിൽ മൃതിയടയുന്ന കുരുന്നു ജീവിതങ്ങൾ

ഇടയ്ക്കുള്ള ഡൽഹിയിൽ നിന്ന് കേരളത്തിലേക്കുള്ള യാത്രയിൽ ഞാൻ ഒരു ദിവസം പരിചയപ്പെട്ടത് ഒരു യു.പി സ്വദേശിയായ ചെറുക്കനെയാണ്. ഏകദേശം 16 വയസ്സ് എന്നാണ് അവൻ തന്നെ പറഞ്ഞത്. കേരളത്തിൽ 13 വർഷമായി എത്തിയിട്ട്.  നന്നായി മലയാളം പറയും. എറണാകുളം സൗത്തിലെ ഒരു ഹോട്ടലിൽ പൊറോട്ട മേക്കറാണ് കക്ഷി.

ഇനിയാണ് മൂപ്പരുടെ രസകരമായ കഥ. 13 വർഷത്തിന് ശേഷം ഹരിയാനയിലെ അമ്മയുടെ അനുജത്തിയുടെ മകളെ കാണാൻ പോയതാണ്. അവിടെ അമ്മയുടെ അനുജത്തിയുടെ പെൺമക്കൾ മുറപ്പെണ്ണാണ് എന്നറിയാൻ പറ്റി. പെണ്ണിന് ഇപ്പോൾ 10 വയസ്സ്, 13 വയസ്സ് ആകുമ്പോൾ അവൻ അവളെ കല്യാണം കഴിക്കും. കല്യാണം ഉറപ്പിച്ചതിന്റെ ഫോട്ടോയൊക്കെ എനിക്കവൻ കാണിച്ചു തന്നു. ഇത് വർഷങ്ങൾക്ക് മുമ്പുള്ള കഥയൊന്നുമല്ല. ഒരു വർഷം മുമ്പുള്ള കഥ. ഇങ്ങനെ എട്ടും പൊട്ടും തിരിയാത്ത എത്ര ആൺ കുട്ടികളും പെൺകുട്ടികളും കല്യാണം കഴിച്ചു പ്രായപൂർത്തിയാകും മുൻപ് തന്നെ ഒന്നും രണ്ടും പിള്ളേരായി അതിനെ വളർത്താൻ പ്രാപ്തിയില്ലാതെ കേരളത്തിന്റെ വഴിയോരങ്ങളിൽ ബലൂൺ, പേന കച്ചവടവും മൊബൈൽ ഫോൺ ആക്‌സസറീസ് വിൽപനയും ഒക്കെയായി നമ്മുടെ കൺവെട്ടത്തിൽ കാണുന്നുണ്ട്. ഇവരെയാരും കാണാത്തതാണോ, കണ്ടിട്ടും കണ്ടില്ലെന്ന് നടിക്കുകയാണോ!!

©മോഹൻദാസ് വയലാംകുഴി

ജീവിതത്തിനും സ്വപ്നങ്ങൾക്കുമിടയിൽ മയങ്ങി വീഴുന്നവർ...

സെൻട്രൽ യൂണിവേഴ്‌സിറ്റിയുടെ മുന്നിലെ ഗേറ്റിന് മുന്നിൽ ബസ്സ് കാത്തു നിൽക്കുമ്പോൾ ഒരച്ഛൻ അവിടെ നിൽക്കുന്നത് കണ്ടു. അവിടെ ഒരു ഡിപ്പാർട്മെന്റിൽ രണ്ടാം സെമസ്റ്റർ വിദ്യാർത്ഥിയാണ് മകൻ. അച്ഛൻ വീട്ടിൽ നിന്ന് ഇറങ്ങിയത് മുതൽ യൂണിവേഴ്‌സിറ്റിക്ക് വരുന്നുണ്ടെന്ന് പറഞ്ഞു മകന് വോയിസ് മെസ്സേജ് അയച്ചതൊക്കെ മകൻ കേട്ടിട്ടുണ്ട്. പിന്നീട് അയച്ചതിനൊന്നും ഒന്നിനും മറുപടി നൽകിയില്ല,  കേട്ടിട്ടു കൂടിയില്ല. ഞാൻ അറിയാവുന്ന ഒരു സുഹൃത്തിനെ വിളിച്ചു പറഞ്ഞപ്പോൾ, അവനെ അവർ വിളിച്ചോ എന്നറിയില്ല, അവന്റെ വോയിസ് മെസ്സേജ് വന്നു, ഞാൻ കാഞ്ഞങ്ങാട് ഉണ്ടെന്ന് പറഞ്ഞു. പിന്നീട്‌ ഒരു മെസ്സേജും വന്നില്ല. വീട് കാഞ്ഞങ്ങാട് ആണെന്ന് പറഞ്ഞു. 10 കിലോമീറ്റർ അകലെ വീടുണ്ടായിട്ടും ഹോസ്റ്റലിൽ താമസിക്കുന്നതും സ്വന്തം അച്ഛൻ വിളിക്കുമ്പോൾ ഫോൺ എടുക്കാതെ വോയ്‌സ് മെസ്സേജ് അയക്കുന്ന ആ മകൻ എങ്ങനെയാണെന്നറിയാനുള്ള ആകാംക്ഷ എനിക്കുണ്ടായിരുന്നു. അച്ഛനോട് ചോദിച്ചു, മകന് എന്തെങ്കിലും മോശം കൂട്ടുകെട്ട് വല്ലതും ഉണ്ടോ എന്ന്. ഇല്ല, അങ്ങനെയുണ്ടാവാൻ വഴിയില്ല, പൈസയൊന്നും അധികം കൊടുക്കാറില്ല, ആവശ്യത്തിന് മാത്രമേ നല്കാറുള്ളൂ എന്നൊക്കെയാണ് ആ അച്ഛൻ പറയുന്നത്. അമ്മയുമായി നല്ല കൂട്ടുമാണ് എന്നൊക്കെ ചോദിക്കാതെ പറഞ്ഞു. അച്ഛൻ പഴയ ബിഎഡ് കഴിഞ്ഞു അധ്യാപകനൊക്കെ ആയിരുന്നു, പിന്നീട് പഞ്ചായത്ത് സെക്രട്ടറിയൊക്കെ ആയി റിട്ടയർ ചെയ്ത മനുഷ്യനാണ്. മകന് എന്തൊക്കെയോ ഒരു സഞ്ചിയിൽ പൊതിഞ്ഞു കെട്ടി കൊണ്ടുവന്നിട്ടുമുണ്ട്. ആ അച്ഛന്റെ നിസ്സഹായത കണ്ടു ഞാൻ എന്തുപറയണമെന്നറിയാതെ പകച്ചു നിന്നു.

എൻറെ മകൻ നല്ലവനായ ഉണ്ണിയാണെന്നും അവൻ മോശം കൂട്ടുകെട്ടിലൊന്നും പോകില്ലെന്നും അവനൊരു പാവമാണെന്നും ധരിച്ചു വെച്ചിരിക്കുന്ന അച്ഛനമ്മമാർ അറിയുന്നുണ്ടോ എന്നറിയില്ല, അവർ പണം കണ്ടെത്തുന്ന പുതിയ മാർഗ്ഗങ്ങളെക്കുറിച്ച്, അവർ ഉപയോഗിക്കുന്ന പുതിയതരം മയക്കുമരുന്ന്കളെക്കുറിച്ച്, അവർ ചെന്നുപെടുന്ന ചക്രവ്യൂഹത്തെക്കുറിച്ച്... ഇത് മകനെക്കുറിച്ചു മാത്രമാണെന്ന് തെറ്റിദ്ധരിച്ചു വെച്ചിരിക്കുന്ന അച്ഛനമ്മമാരോട് പറയാനുള്ളത് സ്വന്തം മകളും ഇതുപോലെയൊക്കെത്തന്നെയാണ്.

പെൺകുട്ടികളുടെ അടിവസ്ത്രങ്ങളിൽ എം.ഡി.എം.എ പോലുള്ള വളരെ വിലകൂടിയ മയക്കുമരുന്നുകൾ സൂക്ഷിക്കാനുള്ള സൗകര്യങ്ങൾ ഉണ്ടെന്ന് പറഞ്ഞാൽ ആരെങ്കിലും വിശ്വസിക്കുമോ.?

മയക്കുമരുന്നുകൾ ഉപയോഗിച്ച് ബോധം നഷ്ടപ്പെട്ട് യാതൊരു മടിയുമില്ലാതെ ലൈംഗീക ബന്ധത്തിലേർപ്പെട്ട് ഒടുവിൽ സ്വബോധം വീണ്ടെടുക്കുമ്പോൾ ദൃശ്യങ്ങളായും വീഡിയോകളായും പുറത്തു പോകുന്നതും അതുവെച്ചുള്ള ബ്ളാക്ക് മെയിലിംഗും പിന്നീട് ഈയൊരു സംഘത്തിന് വേണ്ടി കാരിയർ ആകുന്നതും വേറെ വഴിയില്ലാത്തതുകൊണ്ടാണ്. എത്രയെത്ര ജീവിതങ്ങൾ ഇങ്ങനെ ഒരു നിമിഷത്തിൻറെ ലഹരിയിൽപ്പെട്ടു നശിച്ചുപോകുന്നത്.

ജയിലുകളിൽ എത്തപ്പെടുന്ന കേസുകൾ പരിശോദിച്ചാൽ അറിയാൻ പറ്റുന്നത് അതിലും ഭീകരമാണ്. എളുപ്പത്തിൽ പണമുണ്ടാക്കാനും പല തരത്തിലുള്ള കടം വീട്ടാനുമായി ലഹരി വില്പനയ്ക്കിറങ്ങി പെട്ടവരാണ്. എന്നും പൈസയ്ക്ക് വേണ്ടി മാത്രം ശല്യപ്പെടുത്തുന്ന ഭാര്യമാരും ചില അച്ഛനമ്മമമാരും അറിയുന്നില്ല, എളുപ്പത്തിൽ പണമുണ്ടാക്കാൻ മക്കൾ ഇത്തരം മയക്കുമരുന്ന് മാഫിയ സംഘത്തിൽപ്പോയി തലവയ്ക്കുന്നത്. ഒന്നോ രണ്ടോ പ്രാവശ്യം ലഹരി കടത്ത് നടത്തി സഹായിച്ചു പൈസ കിട്ടി ആവശ്യങ്ങൾ സാധിച്ചാൽ പിന്നീട് പണത്തിന് ആവശ്യം വരുമ്പോഴൊക്കെ ഒരു ഭയവുമില്ലാതെ വീണ്ടും ഇതിലേക്ക് ചെല്ലുന്നവരുണ്ട്.

പഠിക്കുന്ന പെൺകുട്ടികളാണ് ഇപ്പോൾ ലഹരി മാഫിയയുടെ കാരിയർ ആയി കൂടുതലും ഉള്ളത്. പെൺകുട്ടികളാകുമ്പോൾ കൂടുതൽ പരിശോധനകളൊന്നും ഉണ്ടാവില്ല എന്നതും ഒരു ഗുണമാണ്. സാധാരണ പരിശോധനകളിലൊന്നും പെടാതെ സാധനം എത്തേണ്ടിടത്ത് എത്തുമെന്നുള്ളതും ഇത്തരം മാഫിയകൾക്ക് പെൺകുട്ടികളെ ഉപയോഗിച്ചുള്ള കടത്തലുകൾക്ക് ഉപകാരമാകുന്നു. ജയിലുകളിൽ എത്തിപ്പെട്ട പെൺകുട്ടികളുടെ എണ്ണമെടുത്താൽ എല്ലാവരും ഉയർന്ന വിദ്യാഭ്യാസ യോഗ്യതയുള്ളവരാണ്. 

കള്ളും കഞ്ചാവും ഇപ്പോഴത്തെ തലമുറയ്ക്ക് വേണ്ട. അതൊക്കെ ഔട്ട് ഓഫ് ഫാഷൻ ആണ്. അവർക്ക് വേണ്ടത് ഏറ്റവും പുതിയ ലഹരികൾ ആണ്. എത്ര ദിവസത്തോളം മയങ്ങി കിടക്കാൻ പറ്റുന്നുവോ അത്രയും ദിവസം ആസ്വദിക്കുക എന്നാണ് ന്യൂ ജെൻ കൺസെപ്റ്റ്. ഒപ്പം വിദേശ ആപ്പുകൾ വഴി സാധനം ബുക്ക് ചെയ്തു കൊറിയർ വഴി വീട്ടിൽ എത്തിക്കുന്നതും പതിവായിരിക്കുന്നു. ആരെങ്കിലും പിടിച്ചാൽ പഠിക്കാനുള്ളതാണ്, ലാബിലേക്കാണ്, ഓർമ്മ ശക്തി കൂട്ടാനുള്ള മരുന്നാണ്, ഷുഗർ ഫ്രീ ടാബ്‌ലറ്റ് ആണ് എന്നൊക്കെ പറഞ്ഞു വീട്ടുകാരെ വിശ്വസിപ്പിക്കും. 

പറയാനാണെങ്കിൽ കഥകൾ ഇങ്ങനെ അനവധി നിരവധി...

©മോഹൻദാസ് വയലാംകുഴി

#cuk #centraluniversityofkerala #students #drugs #drugabuse #kasaragod #kerala

#Me Too

 

എന്റെ ജീവിതത്തിലെ പ്രണയത്തിന്റെയും പ്രണയ പരാജയത്തിന്റെയും തുറന്നെഴുത്ത്.

Stay tuned here....